Siońnia ŭ Vašynhtonie tamtejšyja eksperty prezentujuć dakład "Alternatyŭnyja scenary budučyni Rasiei". Samy epatažny varyjant u Endru Kačynsa: "Rasieja i śviet buduć uzrušanyja zabojstvam Uładzimiera Pucina na vychadzie z chramu Chrysta Zbaŭcy paśla ŭsianočnaj 7 studzienia 2008 hodu".
Dalej Kačyns pradrakaje zabureńni, nadzvyčajnaje stanovišča, umacavańnie kłanu siłavikoŭ, rost nacyjanalizmu, rasstreł strajku naftavikoŭ, śmiarotnyja prysudy Matvijency i Łužkovu (!) — karaciej, poŭny kašmar!
Daj boh zdaroŭja pieraličanym asobam, ale ž kali adkinuć dolu epatažu, to namalavany scenar naŭrad ci nazavieš niejmaviernym.
Usie imperyi chistkija. Ci pradbačyła Rasieja stahodździe tamu, što na parozie ŭžo balšavicki pieravarot i kryvavaja hramadzianskaja vajna? A ci šmat chto padčas brežnieŭskaha zastoju mierkavaŭ, što Saviecki Sajuz abryniecca, jak heta adbyłosia ŭ 1991-m?
Siońniašniuju Rasieju siłkuje adno što "enerhietyčny napoj". Na varjackaj naftahazavaj kanjunktury robić kalasalnyja hrošy vuzkaje koła asobaŭ. Astatnim pierapadaje chiba kaliva. Pra sapraŭdnuju madernizacyju ekanomiki, zdajecca, nichto nia dbaje. Ale ž da pary zban vadu nosić.
Rasieja, hetaje šmatkovaje polietničnaje i polikanfesyjnaje ŭtvareńnie z karumpavanaj uładaj, moža pajechać pa švoch kali zaŭhodna. Vyhladaje na toje, što i ciaham ciapierašniaj aperacyi "Pierajemnik", chacia nibyta ŭsio i schoplena, na dušy ŭ kramloŭcaŭ nie zusim spakojna. Heta moža adbicca i na taktycy pieramovaŭ Pucina z Łukašenkam.
Spałučeńniem šantažu i drobnych sastupak Kreml chacieŭ by zaraz, kali jahonyja koni na pierapravie, neŭtralizavać palityčny impet biełaruskaha kiraŭnika. Bo jašče nakarkaje toj Kačyns… Łukašenka ž — fihura, zdolnaja małankava zhulać na sytuacyi, varta tolki ŭ Rasiei zavarycca jakoj kašy. Mienavita tamu, darečy, versyja, što Maskva prapanuje jamu niejkuju stałuju pasadu ŭ abjadnanaj dziaržavie, vyhladaje małajmaviernaj.
Brutalny ža razhon učorašniaj akcyi pratestu, prymierkavanaj da vyzytu Pucina, naŭrad ci možna traktavać najpierš jak žadańnie linuć balzamu na serca hościu. Heta chutčej mesydž palityčna niaŭrymślivym suhramadzianam. A to paśla vosieńskich maršaŭ ich mo' ŭžo eŭfaryja apanavała. Zahamanili: vo, tabu z Kastryčnickaha placu źniataje! Dyk voś chaj viedajuć, chto ŭ chacie haspadar!
Vidavočna, što nia chočacca sastupać ni kaliva ni Maskvie, ni Zachadu, ni hramadzianskaj supolnaści. Ale ž trymać adrazu try franty nierealna. I kryj boža, kab abrynuŭsia ŭschodni front.
