Da 1 śniežnia praciahvajecca kampanija pa vakcynacyi nasielnictva suprać virusu hrypu.
Pra heta siońnia na pres-kanfierencyi paviedamili zahadčyca adździaleńnia imunaprafiłaktyki Respublikanskaha centra hihijeny, epidemiałohii i hramadskaha zdaroŭja Natalla Šmialova i kiraŭnica Nacyjanalnaha centra pa hrypie Natalla Hrybkova.
Praz vysokuju źmienlivaść virusu hrypu čałavieku nakanavana chvareć na hryp pastajanna. Lepšy sposab abaranić siabie — zrabić pryščepku suprać hrypu, kažuć śpiecyjalisty. Užo 18,5% nasielnictva pryščapilisia ad hrypu, a Ministerstva achovy zdaroŭja płanuje, što heta ličba ŭ vyniku składzie 40%.
Asabliva važna pryščapicca ludziam, dla jakich hryp pradstaŭlaje niebiaśpieku ciažkim ciačeńniem chvaroby i ŭskładnieńniami. Heta dzieci i pažyłyja ludzi, asoby z asłablenym chraničnymi chvarobami imunitetam.
U Biełarusi vyznačany śpis hrup nasielnictva, jakija mohuć zrabić pryščepku suprać hrypu biaspłatna. Da ich adnosiacca:
* dzieci ad 6 miesiacaŭ da 3 hadoŭ;
* dzieci z 3 hadoŭ i darosłyja z chraničnymi zachvorvańniami;
* asoby ź imunasupresijaj;
* asoby, starejšyja za 65 hadoŭ;
* ciažarnyja žančyny;
* miedycynskija rabotniki;
* asoby z kruhłasutačnym znachodžańniem dziaciej i darosłych;
* rabotniki słužbaŭ, jakija zabiaśpiečvajuć žyćciadziejnaść i biaśpieku hramadstva.
Što tyčycca vakcynacyi, siońnia ŭ Biełarusi dla prafiłaktyki virusu hrypu vykarystoŭvajecca piać vakcyn:
kitajskaja Fluvaksin, rasijskija Hrypoł, Hrypoł Plus, Ultravak, francuzskaja Vaksihryp i hałandskaja Influvak. Šmialova i Hrybkova zapeŭnili, što ŭsie hetyja vakcyny jakasnyja i prachodziać pravierku niepasredna ŭ Biełarusi.
Adnak jany adroźnivajucca schiemaj dziejańnia. Najlepšy imunitet suprać hrypu raźvivajuć split-vakcyny, jakija utrymlivajuć raździeleny na składniki deaktyvavany virus hrypu — Fluvaksin i Vaksihryp. Mienavita takimi vakcynami pryščaplajuć ludziej z hrupy ryzyki.
Rasijskaja žyvaja vakcyna Ultravak taksama stvaraje dobry imunitet, ale hetaja vakcyna ŭtrymlivaje asłablenyja žyvyja virusy i pa sutnaści vyklikaje zachvorvańnie ŭ lohkaj formie.
Vakcyny Hrypoł, Hrypoł Plus i Influvak utrymlivajuć tolki pavierchnievyja antyhieny virusaŭ i źjaŭlajucca słabiejšymi pa svaim efiekcie.
Adnak śpiecyjalisty zaŭvažyli, što pierad vakcynacyjaj nieabchodna abaviazkova prakansultavacca z uračom, kab upeŭnicca ŭ adsutnaści supraćpakazańniaŭ i padabrać pravilny typ vakcyny.
Naprykład, pryščepka ŭ haradskoj paliklinicy «Vaksihrypam» ci «Influvakam» kaštuje kala 81-85 tys. rubloŭ, u pryvatnym miedycynskim centry — kala 150 tys.
