Dla minskaha «Dynama» treci matč hrupavoha etapa Lihi Jeŭropy suprać francuzskaha «Hienhama» byŭ ci nie apošniaj nadziejaj za niešta pazmahacca ŭ jeŭrakubkach. Na žal, u pieršych hulniach biełarusy atrymali dźvie bujnyja parazy ad hrečaskaha PAOKa i italjanskaj «Fijarenciny».
«Hienham» – zručny dla skančeńnia čornaj sieryi supiernik. Kamanda zajmaje pieradapošniaje miesca ŭ čempijanacie Francyi. Navat bukmiekiery nazyvali favarytam minski kłub.
Pieršy tajm paćvierdziŭ, što «Hienham» pa zubach «Dynama». Biełarusy ź miesca rynulisia ŭ ataku. Užo na treciaj chvilinie Fihiereda patrabavaŭ pryznačyć pienalci ŭ varoty supiernika. Sapraŭdy, padałosia, što abaronca pryniaŭ našaha ŭruhvajca na ściahno.
Momanty byli ŭ Dža Džedže, jaki vyjšaŭ na vastryni dynamaŭskaj ataki. A Nienad Adamavič z davoli vyhadnaj pazicyi ŭdaryŭ prosta ŭ ruki bramniku «Hienhama». Nielha skazać, što nie ahrazalisia i francuzy. Jany raz za razam sprabavali złavić minčukoŭ na kontratakach, ale abarona nie davała zbojaŭ.
Vidać, varta asobna adznačyć dynamaŭskich fanataŭ, jakija ŭ maroznaje nadvorje vybralisia ŭ Barysaŭ na hulniu. Fan-siektar naličvaŭ čałaviek čatyrysta. Chłopcy vielmi dobra padtrymlivali svaju kamandu, nie ścichajučy na praciahu ŭsiaho matču.
Na 54-aj chvilinie vydatnuju mahčymaść zabić nie skarystaŭ abaronca Siarhiej Kancavy. Abaronca dałučyŭsia da ataki «Dynama» padčas vuhłavoha i miač jakraz sustreŭsia ź jahonaj hałavoj, ale bramnik byŭ na miescy.
Stasievič i Vieraciła aryhinalna razyhryvali štrafny, ale ŭdar apošniaha byŭ błakavany i pieraviedzieny na kutni. U tym rozyhryšy dobra biŭ Nikalič, ale miač palacieŭ vyšej pierakładziny.
Čym mieniej času zastavałasia da finalnaha śvistka, tym čaściej atakavała «Dynama», a «Hienham» usio radziej pierachodziŭ pałovu pola biełarusaŭ. Zdavałasia, što hoł voś-voś uskałychnie sietku varot haściej.
Na 79-aj chvilinie supieršaniec nie skarystaŭ Słabadan Simavič. Bramnik užo vyklučany z momantu, ale padviała dakładnaść sierba.
Dziela spraviadlivaści zaŭvažym, što samy dobry momant upuścili hulcy «Hienhama». Mandan vyrvaŭsia adzin na adzin ź Ihnatovičam. Naš bramnik spačatku dziornuŭsia napierad, a potym spyniŭsia. Cudam miač trapiŭ u štanhu, a na dabivańni nikoha nie było.
«Dynama» tak i nie zabiła ŭ kancoŭcy – 0:0. Škada, tak chaciełasia, kab biełaruski futboł pryhoža reabilitavaŭsia paśla parazy BATE. Praz dva tydni «Dynama» i «Hienham» zhulajuć užo ŭ Francyi.
