Supracoŭnik DAI Viciebskaj vobłaści pakarany za niecenzurnuju łajanku i pahrozy, paviedamlaje sajt pravaabaroncaŭ spring96.org.
Pravaabaroncy adznačajuć, što sud nad supracoŭnikam Dziaržaŭtainśpiekcyi adbyŭsia nie pa zajavie pakryŭdžanaha: milicyjaniery skłali pratakoł na svajho kalehu na padstavie zapisu videarehistratara, vykładzienaha ŭ internecie.
Incydent adbyŭsia ŭ Połacku tydzień tamu. Na vykładzienym u internet videazapisie bačny hramadzianski «Falksvahien», za rulom jakoha znachodzicca čałaviek u formie supracoŭnika DAI. Jon zahadvaje spynicca spadarožnaj aŭtamašynie «Miersiedes» i źviartajecca da vadziciela ŭ niecenzurnaj formie.
Paśla źjaŭleńnia videazapisu ŭ internecie vadzicielu i pasažyru «Miersiedesa» patelefanavali ź milicyi, apytali i vyklikali ŭ sud na 17 kastryčnika ŭ jakaści śviedki i paciarpiełaha. Inśpiektara DAI pakarali na padstavie dvuch artykułaŭ KoAP — za chulihanstva (niecenzurnuju łajanku ŭ hramadskim miescy) i za pahrozy. Pravaparušalnika nie tolki aštrafavali za takija dziejańni, ale i zvolnili z DAI.
Jak adznačajuć pravaabaroncy, Michaił, siabar vadziciela «Miersiedesa», jaki vykłaŭ videazapis u internet, zusim nie čakaŭ, što supracoŭnika DAI pakarajuć. Tamu siabry nie źviartalisia ni ŭ sud, ni da kiraŭnictva rajonnaj DAI sa skarhami — nie było davieru.
Ale videarolik nabraŭ bolš za 50 tysiač prahladaŭ, byŭ retranślavany ŭ połackich i navapołackich hrupach sacyjalnych sietak, i karystalniki internetu pieravažna vykazvalisia za toje, što supracoŭnika DAI treba pakarać. Zaraz u abmierkavańniach pišuć ab tym, što zamoŭčvać hety vypadak było ŭžo niemahčyma — zanadta šyroka jon staŭ viadomy. Taksama ŭdzielniki abmierkavańnia pišuć, što abaraniać svaje pravy i damahacca vykanańnia zakanadaŭstva varta, u tym liku i takimi mietadami, jak zdaryłasia hetym razam: nadańniem publičnaści kožnamu padobnamu zdareńniu.
