Adziny kandydat ad demakratyčnych siłaŭ Alaksandar Milinkievič robić staŭku na pajezdki pa krainie i asabistyja sustrečy z vybarcami. A ŭłady — na zapałochvańnie. Za Milinkievičam nieadčepna chodziać hicli ź videakamerami. Za vami kali-niebudź padhladali? Ujavicie sabie: miesiacami žyć pad nahladam. Napeŭna, psychalahična vytrymać heta ciažka. (Ale ž hebisckija palittechnalohii!)
U dzień Milinkievič pravodzić dziasiatki sustrečaŭ. Z dvaccaćciu, tryccaćciu, ale najčaściej — z paraju čałaviek. U vyniku za 24 hadziny jon paciskaje dźvie sotni ruk.
Inšyja pretendenty na prezydenctva burčać. Akademik Alaksandar Vajtovič: «Ale sustrakacca tre było b niejak šyroka. Treba šyrej niejak brać». Uładzimier Kołas: «Infarmacyi pra hetyja pajezdki i tym bolš pra ich vynik praktyčna niama. Biezumoŭna, ahulnaje ŭražańnie, čakali, što ŭsio heta budzie macniej. My majem toje, što majem. Voś hetyja pajezdki z zahadzia viadomym vynikam i ŭsio astatniaje. Bo voś prosta takija pajezdki pa pravincyi — heta vielmi, vielmi mała».
Nichto z krytykaŭ nia kaža, dyk što ž rabić.
A.Milinkievič pryznavaŭsia paśla abrańnia, što jahony ideał palityka — Vacłaŭ Havał. Z symbaličnaj sustrečy z Haŭłam u kastryčniku A.Milinkievič i pačaŭ svaju pretendenckuju dziejnaść.
U 1978 hodzie, za 11 hadoŭ da Aksamitnaj revalucyi, Havał napisaŭ svajo znakamitaje ese «Siła biaśsilnych». Ab tym, jak važna žyć u praŭdzie, kali vakoł panuje chłuśnia.
A.Milinkievič ličyć, što ŭ sytuacyi, kali apazycyja skutaja pa rukach i nahach, a ŭłada rychtujecca zusim nie da vybaraŭ, jamu važna prosta pakazvacca ludziam. Kab tyja choć zdalok bačyli: alternatyva jość, da jaje možna dałučycca. Astatniaje zrobić siła biaśsilnych, spadziajecca jon.
Što z hetaha vychodzić? Z rehijonaŭ paviedamlajuć našy karespandenty.
U teatry zładzili avacyju
Padčas naviedańnia Homielu novy lider apazycyi Alaksandar Milinkievič razam z žonkaj Inaj pahladzieŭ u teatry aperetu Štraŭsa «Žančyna-kažan». Pa zakančeńni imprezy A.Milinkievič nakiravaŭsia da aktoraŭ z kvietkami (darečy, jon byŭ adziny, chto padaryŭ kvietki). Hledačy, paznaŭšy jaho, zładzili avacyju.
Žłobinskija žarści
Kali Alaksandar Milinkievič nakiravaŭsia ŭ Žłobin, u hateli «Jubilejny» raptoŭna była źniataja broń, u inšych hatelach «nie akazałasia volnych miescaŭ». Stolki turystaŭ, razumiejecie, adviedvaje Žłobin!.. Načavać A.Milinkieviču daviałosia na kvatery adnaho z aktyvistaŭ.
Udzień akazaŭsia začynienym «z techničnych pryčynaŭ» muzej, dzie musiła prajści sustreča, a paźniej la prachadnoj Biełaruskaha metalurhičnaha zavodu dva mikraaŭtobusy z kamandaj Milinkieviča byli zablakavanyja lehkavikami specsłužbaŭ i furaj. Ź ich vyjšli maładyja chłopcy spartovaha vyhladu i sprabavali spravakavać bojku, što dało b padstavu vyklikać milicyju i zatrymać usich na niekalki hadzinaŭ.
Na darozie ŭ Miensk, pad Babrujskam, kiroŭcaŭ Milinkievičavych mikraaŭtobusaŭ «neŭtralizavali», zabraŭšy ŭ ich pravy nibyta za pieravyšeńnie chutkaści.
Pretendent-nielehał
U Bieraści milicyjanty skłali pratakoł na demakratyčnaha aktyvista Źmitra Šymanskaha, jaki naładziŭ sustreču ź Milinkievičam u pryvatnaj chacie. Na jaje, darečy, sabrałasia 70 dziejačaŭ bieraściejskaj intelihiencyi. Artykuł — niesankcyjanavany schod.
U Bieraści mašynu A.Milinkieviča zatrymlivali čatyry razy — nibyta ŭ ramkach vyšukovaj aperacyi «Nielehał». A kali A.Milinkievič padaryŭ dziciačamu prytułku vopratku j videakasety z multfilmami pa-biełarusku, supracoŭniki ABEZ zapatrabavali kasety na pierahlad — «kab nie było nijakaha nieviadomaha źmiestu». Ciapier źmiest dziciačych kazak «Papiałuška» i «Pryhažunia ŭ sonnym lesie» supracoŭnikam ABEZ viadomy.
Z takich sytuacyj składajecca vybarčaje turne kandydata ad apazycyi. Takaja jana, biełaruskaja demakratyja.
