Źjaŭleńnie aniekdota pra zhvałčvańnie pornazorki na sajcie «NN» było dla mianie dziŭnym. Nie mienš dziŭnym staŭ praciah — abmusolvańnie i absmoktvańnie temy.
Ja nie lepšy advakat zachodniaj palitkarektnaści, adnak hetaha ŭsiaho prosta nie musiła być. Tak, sama navina ab zhvałčvańni — heta zdareńnie, infanahoda. Adnak kali praciahvać jaho, dyk u absalutna inšy bok, u bok raskryćcia prablemy hvałtu. Na žal, raźviŭsia jon u bok niedarečnych žartaŭ z paciarpiełaj i artykuła Źmitra Mickieviča, što heta narmalna.
Heta nie narmalna.
Pry hetym ja nie admaŭlaju, što śmiajacca možna z usiaho. Nasamreč možna. Ale nie ŭsim. Śmiajacca z usiaho moža trykstar. Błazan. Heta nadzvyčaj važny piersanaž u kultury, heta archietyp. Błazan nadzieleny ŭładaju praź śmiech absalutna z usiaho pakazać hramadstvu jaho zahany. Tamu na scenu vypuskali Džordža Karlina, tamu i vychodzić multsieryjał «Saus Park».
My jašče žyviom u hramadstvie, dzie hramadskaja maral asudžaje hvałt. I ŭ ramkach padparadkavańnia hetaj marali «NN» nie musiła publikavać taki aniekdot, jak i nie musić publikavać aniekdotaŭ pra hienacyd, rasisckija aniekdoty i inš. Takija aniekdoty žyvuć u hramadstvie, i heta prymalna. Ale ŚMI źjaŭlajecca filtram, jaki prapuskaje rečy z chaatyčnaha płavilnaha katła paŭsiadzionnaści ŭ prastoru publičnuju, padparadkavanuju hramadskaj marali.
A bieručy na siabie rolu błazna, ŚMI tym nie mienš nie pierastaje ŭsprymacca jak ŚMI, jak peŭny jakasny filtr. I pasył, jaki tranślujecca ŭ dadzienym vypadku, maŭlaŭ, hvałtavać žančynu možna, asabliva kali jana pornazorka, asabliva kali jana z Rasii.
Što tyčycca teksta Źmitra Mickieviča, luby adukavany čałaviek musić zakryć jaho roŭna na trecim abzacy. Tamu što sp. Mickievič prybiahaje da staroha jak śviet demahahičnaha pryjoma ad personam — pierachodzić na asobu žančyny, asudžaje rod jaje zaniatkaŭ zamiest abmierkavańnia fakta hvałtu suprać čałavieka i reakcyi na hety fakt.
Ja chaču taksama nahadać, što maral raźvivajecca, a čałaviečaja seksualnaść — adna z samych ruchomych i prahresiŭnych jaje elemientaŭ. Kali jašče 150 hadoŭ tamu chiba što adzinaj normaj byŭ hieteraseksualny seks u misijanierskaj pazycyi, dyk siońnia seksałohija kaža pra normu homaseksualnaj aryjentacyi, pierachodzie hramadstvaŭ da paśladoŭnaj manahamii i dalejšaj dyviersifikacyi hetaj śfiery mižčałaviečych adnosin. A prastytucyja i pornaindustryja lehalizavany ŭ mnohich nadzvyčaj raźvitych dziaržavach. Tamu vinić kahości ŭ seksie za hrošy ŭ sučasnym hramadstvie — movieton.
