Za novy film pavodle ramana-antyŭtopii Džordža Orueła «1984» voźmiecca brytanski režysior Poł Hrynhras, paviedamlaje Deadline.
Vytvorčaść filma «1984» zapuścić kampanija Sony, Jaje režysioram pryznačany Poł Hrynhiers, viadomy pa filmach «Kryvavaja niadziela», «Pieravaha Borna» i «Ultymatum Borna» dy śviežym «Kapitan Filips». Pradziusaram stanie Skot Rudyn, uładalnik «Oskara» za «Starykam tut nie miesca». Scenar napiša dramaturh Džejs Hrem.
Data pačatku zdymak i aktorski skład pakul nieviadomyja.
Pieršy film pa ramanie 1949 hoda byŭ źniaty ŭ 1956-m. Bolej viadomy brytanski film režysiora Majkła Andersana, jaki zdymaŭsia ŭ 1984-m.
Pavodle siužetaŭ ramana i filmaŭ, čałaviectva pieražyła hłabalnuju jadziernuju vajnu. Śviet padzialiŭsia na try zvyšdziaržavy. Kožnaja viadzie vajnu z adnoj pry miry z druhoj — ale za adzin dzień siabra i vorah mohuć pamianiacca miescami nie tolki na palityčnaj arenie, ale i ŭ presie, padručnikach historyi i (dabraachvotna) u pamiaci ludziej.
Raman 1984 uvioŭ takija aznačeńni jak «Starejšy Brat» (tatalitarny kiraŭnik i jaho sistema, jakaja kantraluje ŭsie aśpiekty žyćcia hramadzianina i naziraje za im u kožny momant), «anhsoc» (tatalitarnaja palityčnaja sistema, što biaźlitasna źniščaje «vorahaŭ dziaržavy» dy naŭmysna trymaje narod u hoładzie), «navamoŭje» (štučnaja kancylarskaja mova, pryzvanaja zamianić žyvuju hamonku), «dumzłčynstva» (złačynstva, jakoje składajecca z adnoj tolki «złoj» dumki ci sumnievu) i mnohija inšyja. Žartujuć, što niekatoryja sučasnyja kiraŭniki dziaržaŭ usprymajuć «1984» nie jak mastacki tvor, a jak instrukcyju.
