Na daterminovych parłamienckich vybarach u Hrenłandyi pieramahła sacyjał-demakratyčnaja partyja Siumut.
Siumut nabrała 34,3% hałasoŭ, tady jak jaje hałoŭny supiernik — partyja Inuit atakathiit atrymała 33,2% hałasoŭ. Pieravaha skłała 326 hałasoŭ vybarščykaŭ.
Sacyjał-libieralnaj Demakratait addali hałasy 11,8% vybarščykaŭ, novaj partyi Nalerak, jakaja adkałołasia ad Siumut, - 11,6%, a libieralnaj Atasut — 6,5%.
U vyniku ŭ Siumut i Inuit atakatihiit budzie pa 11 deputataŭ u 31-miascovym hrenłandskim parłamiencie, adnak pieramovy ab kaalicyi budzie vieści lidar partyi Siumut Kim Kilsien.
Staršynia Siumut — były palicejski. Jon źjaŭlajecca deputatam z 2005 hoda, niekalki razoŭ byŭ ministram i ŭznačaliŭ partyju paśla sychodu Aleka Chamanda, abvinavačanaha ŭ rastracie dziaržaŭnych srodkaŭ. Hałoŭnaj temaj pieradvybarnaj kampanii Kilsiena była baraćba z karupcyjaj i kumaŭstvom.
U Hrenłandyi z nasielnictvam 56,3 tys. čałaviek naličvajecca 40 423 zarehistravanyja vybarščyki.
***
Hrenłandyja — byłaja kałonija, a ciapier — samakiravanaja terytoryja ŭ składzie Dackaha karaleŭstva. Jana atrymlivaje ad Kapienhahiena štohadovuju dapamohu ŭ pamiery 3,3 młrd kron (450 młn jeŭra) — bolš za pałovu biudžetu terytoryi.
Pa płoščy Hrenłandyja prykładna ŭ 50 razoŭ pieravyšaje terytoryju Danii, bolšaja častka vostrava lažyć za Palarnym kołam i pakryta lodam. Nasielnictva naličvaje prykładna 57 tys. čałaviek, asnoŭnuju častku składajuć eskimosy (inuity).
