Kala 10 tysiač stužačak ź biełaruskim arnamientam razdali 6 śniežnia prachožym na vulicach Minska. Akcyju «Paznač siabie biełarusam» arhanizavała supołka moładzi «Art-Siadziba».
Kala 100 vałancioraŭ u dvuch dziasiatkach punktaŭ stalicy razdali da piaci kiłamietraŭ stužki z nacyjanalnym arnamientam.
Razdača biełaruskich stužačak centry Minska, kala Makdonaldsa na Kastryčnickaj i kala Makdonaldsa, što na Niamizie, u adroźnieńnie incydentu na Kamaroŭcy, prajšła biez zdareńniaŭ, ludzi achvotna brali stužki ź biełaruskim arnamientam.
Stužki razdali za 40 chvilin, milicyja chadziła pobač, ale pytańniaŭ nie zadavała.
Uładzisłaŭ (14 hod), školnik, daviedaŭsia praz sacsietki pra akcyju i vyrašyŭ zapisacca ŭ vałanciery. «Moj baćka kaža zaŭsiedy, što treba abjadnoŭvacca, tamu ja tut», — kaža Uładzisłaŭ.
Kaciaryna i Nata navučajucca ŭ handlovym kaledžy i admysłova pryjechali na Niamihu, kab uziać adrazu 10 stužak.
«Nacyjanalny arnamient ciapier — heta modna, kaža adna ź dziaŭčat. — U mianie samoj jeść zavušnicy z Kalinoŭskim. Voś, uziali sabie stužak, budziem u hrupie razdavać».
Antoś, 27 hod, pryjechaŭ z Maładziečna, kab uziać udzieł u akcyi. Biespracoŭny, ciapier vučycca na kursach tynkoŭcy.
«Ja pryjechaŭ a pieršaj na Art-siadzibu pa stužki, i ich tam užo było niašmat. Ja ŭzradavaŭsia, što tak chutka razabrali, značyć, jeść cikavaść. A 2-j pajšoŭ z płoščy Kołasa da Kupałaŭskaha skviera, i pa darozie razdaŭ usie. Pieršymi sustrełasia paračka maładych ludziej, na vid vielmi intelihientnych, i ja padyšoŭ da ich, kab dać stužku, a jany na mianie pahladzieli ździŭlena i admoŭna zamatali hałovami. Ale ŭ pryncypie ludzi reahavali pazityŭna. Ja jašče jakraz učora pierahledzieŭ film «Majdan» Łaźnicy, i heta ŭźniało moj nastroj, bo kali ŭkraincy zmahli, to i my zmožam».
Jon dadaŭ, što milicyja da jaho nie čaplałasia, nu i jon sam akuratna siabie pavodziŭ, hladzieŭ pa bakach, bo jon «stralany vierabiej».
Ludmiła, 29, volny vandroŭca. Daŭno nie była na radzimie, žyła ŭ Krymie, a ciapier tam chałodna i niemahčyma zarabić hrošy, viarnułasia ŭ hości da mamy.
Ludmiła kaža, što jość tyja, chto biare šmat adrazu dla siabie i siabroŭ, a jość tyja, chto pužajucca, dumajuć, što treba płacić hrošy. Navat byvajuć nie biełarusy traplajucca, kaža Ludmiła, jakija z radaściu padtrymlivajuć. Jana razdaje ź siabrami, jakija razam ź jej pryjechali z Kryma. «Takaja ŭ nas internacyjanalnaja kamanda», — kaža jana.
Ludmiła pajšła ŭ Makdonalds hrecca i praciahvaje razdavać stužki tut. «Dałučajciesia da akcyi, heta biaspłatna», - kaža jana.
Siamja, što staić u čarzie, biare pa adnoj, A paśla mužčyna padychodzić i kaža: a dajcie mnie jašče adnu
Loša i Pavieł, taksama padyšli pa stužku: «Daj uzhadaju… Heta simvolika pracy… Arnamient — heta arnamient rabočych biełaruskich, ja čytaŭ niedzie. Doma paviešu kudy-niebudź, na kuchni, kab usie bačyli».
Vika, Daša, Karyna. «My tut, bo my nieabyjakavyja biełaruski», — kažuć jany.
Niekatoryja admaŭlajucca brać, ale bolšaść achvotna zabiraje stužki, niechta kaža: «O, ja bačyŭ u siabra, ale ŭ mianie niama jašče, dajcie stužku».
Adna ź dziaŭčataŭ vučycca ŭ BNTU, druhaja — u Akademii mastactvaŭ, treciaja — školnica. Prachožyja kažuć dziaŭčatam, što jany — małajčynki.
Praŭda, kali prapanavali dziaŭčaty stužki žančynam u futrach, to tyja naadrez admovilisia.
Voś inšyja prachožyja telefanujuć i prychodziać pa stužki, ale adkazvajuć pa-rusku «Spasibo».
Zatoje kitajcy biaruć stužki i kažuć pa-biełarusku «Dziakuj».
Jarasłaŭ i Lena — studenty z Charkava, pryjechali ŭ Minsk na 5 dzion.
«U nas zaraz va Ukrainie vielmi mocna aktyvizavałasia heta ŭsie — našy kolery, našy ściahi. Ubačyli stužki na vulicy, vyrašyli padyści, zabiarem z saboj i budziem nasić».