Libieralna-demakratyčnaja partyja (ŁDP) prapanoŭvaje abmiežavać prodaž ałkaholu ŭ Biełarusi. Partyja padrychtavała šerah adpaviednych prapanoŭ, jakija nakiroŭvaje ŭ Minharvykankam i Saviet ministraŭ, paviedamlaje pres-słužba ŁDP.
15 śniežnia na apieratyŭnaj naradzie staršynia Minharvykankama Andrej Šorac daručyŭ abmiežavać režym pracy i čas prodažu śpirtnych napojaŭ u sietcy staličnych mini-kafe «Chutka-smačna». Takoje rašeńnie jon pryniaŭ, zasłuchaŭšy dakład načalnika HUUS Minharvykankama Alaksandra Barsukova ab parušeńniach u hetych handlovych abjektach.
Libierał-demakraty zajaŭlajuć, što padtrymlivajuć hetaje rašeńnie jak «pravilny krok u baraćbie z deałkahalizacyjaj nasielnictva».
«ŁDPB hatovaja padtrymać usie pačynańni kiraŭnictva horada ŭ hetym kirunku, — havorycca ŭ paviedamleńni partyi. — U svaju čarhu my prapanoŭvajem šerah mier, pryniaćcie jakich dazvolić istotna palepšyć situacyju. My razumiejem, što adnymi zabaronami prablemu nie vyrašyć, patrebny kompleks mier — vychavaŭčych, ideałahičnych, prafiłaktyčnych».
Biełarusy ź dziacinstva pavinny razumieć, što «pić śpirtnoje — heta drenna» i «nie modna», a «mocny ducham i razumny čałaviek — heta ćviarozy čałaviek». «Ale jak heta mahčyma, kali, uvajšoŭšy ŭ mahazin, pieršaje, što my bačym, — mnostva palic z bahatym vybaram butelek z pryhožymi raznastajnymi nalepkami i cenami. Luby padletak, luboje dzicia ŭ našym mahazinie zrobić vysnovu — pić modna, dobra, kruta».
U suviazi z hetym libierał-demakraty prapanavali pradavać ałkahol tolki ŭ śpiecyjalna adviedzienych pad hetyja mety handlovych abjektach. Pakul takich niama, ŁDP ličyć metazhodnym realizoŭvać ałkaholnuju pradukcyju ŭ śpiecadździełach mahazinaŭ, uvachod u jakija dla niepaŭnaletnich budzie zabaronieny.
Aprača taho, u partyi ličać nieabchodnym abmiežavać prodaž śpirtnych napojaŭ u načny čas, a taksama adkryvać tolki tyja kruhłasutačnyja mahaziny, dzie ałkahol naohuł pradavacca nie budzie. «Kateharyčna zabaranić adkryćcio takich mahazinaŭ u žyłych damach, tamu što heta naradžaje złačynnaść i stymuluje spažyvańnie śpirtnoha. Niedapuščalnaja krokavaja dastupnaść ałkaholu», — havorycca ŭ paviedamleńni libierał-demakrataŭ.
U ŁDP taksama prapanoŭvajuć u dziesiacirazovym pamiery ŭzmacnić administracyjnuju adkaznaść za prodaž śpirtnoha niepaŭnaletnim, až da pazbaŭleńnia licenzii na realizacyju hetaj pradukcyi pry paŭtornym parušeńni. Zabarona na prodaž niepaŭnaletnim pavinna, na ich dumku, taksama raspaŭsiudžvacca na enierhietyčnyja napoi.
Aprača taho, miarkujuć u partyi, treba «kančatkova zabaranić pramuju ci ŭskosnuju rekłamu śpirtnych napojaŭ u lubym vyhladzie».
