Pieršym vice-premjeram pryznačany Vasil Maciušeŭki. Jon zaniaŭ miesca Uładzimira Siamaški, jaki spuściŭsia na prystupku nižej, ciapier jon prosta vice-premjer.
Vasil Maciušeŭski naradziŭsia ŭ 1969 hodzie ŭ Oršy. Paśla zakančeńnia BDU pa śpiecyjalnaści «Palityčnaja ekanomija» (1991) jon pastupiŭ u aśpiranturu. Pa vynikach navučańnia Maciušeŭski abaraniŭ u 1995 hodzie kandydackuju dysiertacyju pa temie «Kanceptualnyja asnovy farmiravańnia źniešnieekanamičnaj palityki Biełarusi».
Skončyŭšy ŭniviersitet, Maciušeŭski pabyŭ pa paŭhoda načalnikam adździeła ŭ NPA «Fieniks» i navukovym supracoŭnikam u NII Dziaržpłana, a paśla ŭładkavaŭsia trecim sakratarom adździeła mižnarodnych ekanamičnych adnosinaŭ u MZS Biełarusi.
U krasaviku 1994 jon pryjšoŭ u Nacbank. Tut jon zatrymaŭsia da 2010 hoda ź pierapynkam na hod pracy daradcam u ministerstvie finansaŭ.
U Nacbanku Maciušeŭski spačatku byŭ hałoŭnym ekanamistam adździeła, a ź ciaham času daros da namieśnika staršyni praŭleńnia.
Voś jahony zdymak za pačatak 2000-ych:
Maciušeŭski kuryravaŭ pytańni pryciahnieńnia zamiežnych inviestycyj u bankaŭskuju sistemu, a taksama kiravańnie zołatavalutnymi reziervami.
Pavodle čutak, bankir byŭ na karotkaj nazie ź Viktaram Łukašenkam i vykonvaŭ rolu niefarmalnaha finansavaha daradcy prezidenckaj siamji.
U 2010-m Maciušeŭski syšoŭ kiravać biełaruskim padraździaleńniem rasijskaha «Śbierbanka». Na pasadzie staršyni praŭleńnia «BPS-Śbierbanka» jon i zastavaŭsia da pryznačeńnia va ŭrad.
Maciušeŭski ciapier. Fota tut.by.
Jak i inšyja byłyja namieśniki Piatra Prakapoviča pa Nacbanku, Maciušeŭski atrymaŭ učastak niepadaloku ad Drazdoŭ, u «pasiołku bankiraŭ». Na hetych 0,11 ha i staić katedž novaha pieršaha vice-premjera.
