Premjer-ministr Biełarusi Andrej Kabiakoŭ, jaki atrymaŭ pryznačeńnie ŭ razhar padrychtoŭki da navahodnich śviataŭ, u aŭtorak faktyčna debiutavaŭ u novaj jakaści i pavinšavaŭ maleńkich pacyjentaŭ urałahičnaha adździaleńnia 2-j haradskoj dziciačaj kliničnaj balnicy.
Adździaleńnie raźličana na 60 uraniefrałahičnych chvorych, na jaho bazie isnuje Respublikanski centr dziciačaj urałohii. «Lečacca tut dzieci z usioj krainy, mnohija vymušanyja znachodzicca ŭ klinicy i miesiac, i dva, i try, nieadnarazova źviartacca dla praciahu lačeńnia. Kamuści pryjdziecca, na žal, sustreć Novy hod u adździaleńni. Chočacca, kab u ich taksama zdarylisia cudy, jany adčuvali siabie kamfortna, u nastroi», — raspaviała hałoŭny ŭrač balnicy Łarysa Siačko.
Siarod dasiahnieńniaŭ balnicy za apošnija hady jana adznačyła rezki rost kolkaści transpłantacyj nyrak dzieciam. Kali da 2009 hoda ich było zroblena biełaruskim dzieciam usiaho 7, pryčym usie — za miažoj, z 2009-ha pa 2014 hod užo ŭ Biełarusi vykanana 83 transpłantacyi. «U liście čakańnia ŭ nas zastałosia ŭžo zusim niaznačnaja kolkaść dziaciej. Raniej jany hadami čakali, pakul dabračynnyja arhanizacyi źbiaruć finansavyja srodki dla apieracyi za miažoj, ciapier pierasadki vykonvajuć vielmi apieratyŭna, i jakaść žyćcia ŭ dziaciej zusim mianiajecca», — adznačyła hałoŭny ŭrač.
Pry hetym balnica taksama vykonvaje pierasadki zamiežnym dzieciam — z 2009 hoda ich vykanana bolš za dvaccać. «Heta ekspart pasłuh, heta toje, što treba dla raźvićcia krainy, dla raźvićcia kliniki, heta dazvalaje atrymlivać dadatkovyja finansavyja srodki», — raspaviała Siačko.
Premjer-ministr upieršyniu ŭdzielničaŭ u akcyi «Našy dzieci» ŭ novaj jakaści. Jon naviedaŭ apieracyjnuju i pahutaryŭ z pacyjentami i ich baćkami.
«Zdaroŭ! Chto tut chvareje? — pryvitaŭ premjer druhakłaśnika Daniu i šaścikłaśnika Maćvieja. — Treba papraŭlacca! Novy hod užo doma budziecie sustrakać? Małajcy! Usie bolki ŭ starym hodzie pakidajcie».
«Kab u vas usio ŭ žyćci skłałasia tak, jak vy hetaha chočacie. Kab vy maryli i hetyja mary spraŭdžvalisia. Paviercie, tyja, chto vam kaža, što cudaŭ nie byvaje, jany prosta vydumlajuć, — źviarnuŭsia premjer-ministr da prysutnych u maleńkim zale małych i ich matul. — Cudy byvajuć! Asabliva — na Novy hod. Zadumajcie žadańnie, i jano abaviazkova ździejśnicca dziakujučy baćkam, dziakujučy tym dziadziam i ciociam, jakija pracujuć, kab u krainie było dobra, ciopła i radasna».
Dzieci ŭ karnavalnych kaściumach čytali vieršy i padaryli Kabiakovu samarobnuju jalinku, jakuju jon abiacaŭ pastavić u kabiniecie. Premjer nie zastaŭsia ŭ daŭhu i padaryŭ adździaleńniu chaładzilnik «Atłant», a dzieciam — aviečak z cukierkami.
