Pry stvareńni interjeru my, biezumoŭna, čakajem ad mebli i inšych pradmietaŭ prastory funkcyjanalnaści i erhanamičnaści, imkniomsia da harmonii detalej i cełaha. Nie zabyvajem i pra estetyku. Prapanujem razhledzieć, jakim čynam možna nadać interjeru charaktar dalikatnaj vytančanaści.
Padborka jadnaje rečy zusim roznych fabryk i časoŭ. Naprykład, akruhły stolik dla kavy z tonkaj zihzahapadobnaj aporaj sprajektavany jašče ŭ 1955 h. dla znakamitaha budynku La Pedrera Haŭdzi, taksama jak i kalekcyja śviacilniaŭ ź pierfaravanaha mietału na tonkich hrafičnych nožkach. Aŭtar, architektar Barba Karsini, stvaryŭ rečy, jakija nie zhubili svajoj aktualnaści i siońnia – ich možna nabyć praź internet-kramy.
U svaju čarhu, sistema aśviatleńnia Wireflow z dyjodami ŭjaŭlaje saboj biezdakorna navatarskuju raspracoŭku. Kanstrukcyja sistemy dazvoliła prapanavać šyroki madelny šerah hieamietryčnych kampazicyj. Jarkaść śviatła rehulujecca navat da dasiahnieńnia kamfortnaha aśviatleńnia dla čytańnia. Admietna, jak hetyja tonkija, ledź bačnyja linii zdoleli padparadkavać sabie vieličeznuju prastoru.
U 2014 h. hetaja sistema atrymała prestyžnuju ŭznaharodu Interior Design's 2014: Best of Year Awards u katehoryi «Lepšaja padviesnaja śviacilnia 2014 hoda».
Hrafičnaść i, jak vynik, iluzija dvuchmiernaści abjadnoŭvaje hety prykład z papiarednim.
Nie abminuli ŭvahaj pryvabnaść tonkich abrysaŭ u interjery i vytvorcy dźviarej. Śpiecyjalny schavany aluminijevy korab daje mahčymaść ustalavać pałatno dźviarej u adnoj płoskaści sa ścianoj — biez vykarystańnia lištvaŭ. U vyniku ščylina pa kontury dźviarej składaje ŭsiaho niekalki milimietraŭ. Paśla mantažu dźviery možna pafarbavać toj ža farbaj, što i ścieny – heta nadaść prastory celnaści i hrafičnaści.
Zamiest šafy-kupe dyzajniery prapanujuć novy typ sistemy zachoŭvańnia. Jak i dźviery, vaša šafa budzie vyhladać jak častka ściany. Dźviercy hetaj sistemy mohuć mieć kožnaja svoj typ adkryvańnia, naprykład, adkryvacca na tradycyjnych zaviesach, całkam adjazdžać ubok ci ŭvierch, što charakterna pakul bolš dla kuchonnaj mebli. Łahičnym praciaham abaznačanaj temy možna ličyć i bializnu z matuzkami pa konturach.
Padabranyja rečy byccam pieraniesieny ŭ realnaść z prajekta dyzajniera, jaki jon namalavaŭ u adnu liniju. To tonka pad liniejku, to volna ad ruki.
Davoli lohka znajści i inšyja pradmiety mebli, pryncypy formaŭtvareńnia jakich taksama hruntujucca na vykarystańni tonkich linij i abrysaŭ.
Treba adznačyć, što technałohii ŭ imknieńni dasiahnuć maksimalnaj tonkaści pry zachavańni tryvałaści materyjału demanstrujuć nievierahodnyja vyniki. Stoł kalekcyi «Chiuet» viadomaj paŭdniovakarejskaj studyi «Design-Jay» maje najtančejšuju niezaŭvažnuju stalnicu i takuju ž niezaŭvažnuju trochnohuju aporu. Pry hetym jon zdolny vytrymać vahu kampjutara i televizara.
Nie abaviazkova vykarystoŭvać usio heta razam. Cikavym padajecca paznačyć asablivy typ estetyki interjera i stvaryć ahlad pradmietaŭ, jakija vałodajuć ahulnymi rysami – hrafičnaściu, lohkaściu i vytančanaściu.
