Pavodle źviestak z 229 učastkaŭ, na vybarach u Hruzii pieramahaje Michaił Saakašvili, majučy blizu 58% hałasoŭ. Sam jon užo abvieściŭ pra pieramohu. Ekzyt-poł, praviedzieny dla čatyroch hruzinskich telekampanij, taksama pradkazvaje, što dziejny kiraŭnik dziaržavy nabiare bolej za 50% u pieršym tury.
Adnak hetaja vielmi imaviernaja pieramoha charyzmatyčnaha lidera, adrozna ad jahonaha tryjumfu čatyry hady tamu, užo ni ŭ jakim razie nia budzie vyhladać sapraŭdy elehantnaj.
I reč nia tolki ŭ arytmetycy.
Imidž pałymianaha demakrata nazaŭždy sapsavany vosieńskim razhonam apazycyi, zakryćciom niezaležnaha telekanału i h.d.
Darečy, što da temy "Nie stvary sabie kumira": demakratyčnyja palityki i publicysty nadta lubiać idealizavać roznyja revalucyi dy ich pravadyroŭ… Voś maŭlaŭ, uzor dla nas! Potym, kali ružovaja karcinka rassypajecca, davodzicca maŭčać jak myła źjeŭšy.
Chacia, što b ni zakidali Michaiłu Saakašvili, stupień prazrystaści tamtejšych vybaraŭ nieparaŭnalnaja z našaj: pačynajučy ad litaralnych rečaŭ — prazrystych skryniaŭ — i kančajučy videazdymkaj padliku hałasoŭ. Pakazalna, što misyi naziralnikaŭ jak ad SND, tak i ad ABSE, pry tym što ŭ Biełarusi ich vysnovy niaźmienna palarnyja, tam, u Hruzii, pakul što kažuć tolki pra šerah techničnych chibaŭ, ale, zdajecca, hatovyja pryznać vybary ŭvohule spraviadlivymi.
Miž tym supierniki Saakašvili ŭžo ćvierdziać pra falsyfikacyi, kličuć narod na płošču. Davieru niama. I całkam imavierna, što hetuju šmatpakutnuju, razadranuju krainu buduć jašče nia raz skałanać zabureńni.
Tut šmat čyńnikaŭ — ad rasiejskaha, miakka kažučy, uździejańnia da asablivaściaŭ nacyjanalnaha temperamentu. Ale razam z tym, badaj, varta kazać i pra ŭzrovień palityčnaj kultury, i pra jakaść samoj apazycyi. Pakazalnym jość užo toje, što siarod supiernikaŭ dziejnaha kiraŭnika dziaržavy — takaja nieadnaznačnaja fihura, jak bahaciej Badry Patakarcyšvili, za katorym ciahniecca daŭžezny šlejf kampramatu.
A ciapier pierakiniem mastok da našych realijaŭ.
Mnohim zmaharam za śvietłuju nacyjanalnuju budučyniu mroicca (u tym liku miarkujučy pa forumach "NN"), što jana, hetaja budučynia, nadydzie niejkim cudadziejnym čynam, adrazu. Što ŭ niejki dzień Ch la styrna dziaržaŭnaje ŭłady tryvała stanie manalitnaja kamanda nacyjanalna śviadomych siłaŭ — i dalej usio pojdzie by masłam pamazali… I što narod budzie tolki plaskać u ładki ŭsim novaŭviadzieńniam, siarod jakich peŭna ž buduć i davoli mułkija.
Pry tym što ŭsie paraleli kulhajuć, dośvied šerahu kalarovych revalucyjaŭ pakazvaje: kali nie staje palityčnaj kultury ni ŭ paspalitaha ludu, ni ŭ revalucyjnych pravadyroŭ, z zahannaha koła nacyi vyrvacca nadzvyčaj ciažka.
Tak što znoŭ dazvolu sabie pryvieści vielmi važnuju, na moj pohlad, dumku Jurja Drakachrusta: "Ad jakaści apazycyi nie zaležyć, kali adbudziecca źmiena režymu. Ad hetaj jakaści zaležać formy, u jakich adbudziecca źmiena: čym nižejšaja jakaść — tym bolšaja imaviernaść kryvavaha pierachodu. A samaje hałoŭnaje — ad jakaści apazycyi zaležyć toje, što budzie paśla źmieny".
Voś pra heta varta razvažać užo siońnia.
Nu a što da Saakašvili… U siońniašnich telesiužetach jahonaja biełaja kašula dy błakitny halštuk vyhladajuć elehantna, jak zaŭsiody. Ale čas sapraŭdy elehantnych pieramohaŭ dla jaho minuŭ nazaŭsiody.
Zrešty, prezydenty prychodziać i sychodziać. Važna, kab urešcie Hruzija spraŭdziłasia jak niezaležnaja i demakratyčnaja kraina. A na jaje cisnuć viedajecie jak i viedajecie chto.
ZY. Darečy, Maskva ŭžo atrymała anučaj pa tvary: na adnačasnym z vybarami referendumie balšynia hruzinaŭ vykazałasia za ŭvachodžańnie ŭ NATO.
ZYY. Nu voś, uviečary staršynia CVK Hruzii faktyčna zajaviŭ (kaniešnie, pakul jašče nieaficyjna, z ahavorkami) pra pieramohu Saakašvili z papiarednim vynikam 52,8%
