U Biełarusi z 1 studzienia 2015 hoda ŭviedziena vyvaznaja mytnaja pošlina na kalijnyja ŭhnajeńni. Heta praduhledžana ŭkazam № 654, jaki Alaksandr Łukašenka padpisaŭ 31 śniežnia 2014 hoda. Dakumient apublikavany 7 studzienia na Nacyjanalnym pravavym internet-partale Biełarusi.
Mytnaja pošlina na kalijnyja ŭhnajeńni, jakija vyvoziacca z terytoryi Biełarusi za miežy mytnaj terytoryi Jeŭrazijskaha ekanamičnaha sajuza, ustanoŭlena ŭ 45 jeŭra za tonu, havorycca va ŭkazie.
Ekspartnaja pošlina na biełaruski chłorkalij, nahadajem, była admienienaja ŭ vieraśni 2013 hoda z metaj padtrymki AAT «Biełaruśkalij».
Uviedzieny zbor za ekspart syroj nafty. Heta praduhledžana ŭkazam prezidenta № 655 ad 31 śniežnia 2014 hoda, jaki siońnia apublikavany na Nacyjanalnym pravavym internet-partale.
Dakumientam vyznačana, što «płacielščykami zboru źjaŭlajucca arhanizacyi, jakija realizujuć na ekspart naftu syruju, što pachodzić z Respubliki Biełaruś, i ažyćciaŭlajuć jaje vyvaz z terytoryi Respubliki Biełaruś za miežy terytoryi dziaržaŭ, ź jakimi zaklučanyja mižnarodnyja dahavory ab svabodnym handli».
Zbor ustanaŭlivajecca za adnu tonu nafty ŭ raźličvajecca pa formule z ulikam siaredniaj cany ekspartu hetaj syraviny.
Pry hetym staŭka zboru vyličajecca štomiesiac i vypłačvajecca płacielščykami ŭ respublikanski biudžet u dołarach ZŠA ci jeŭra ŭ sumie, vyznačanaj z ulikam ustanoŭlenaha Nacbankam na dzień vypłaty aficyjnaha kursu biełaruskaha rubla ŭ adnosinach da adpaviednaj zamiežnaj valuty.
Suma zboru ŭklučajecca płacielščykami ŭ zatraty pa vytvorčaści i realizacyi tavaraŭ.
Ukaz nabyŭ moc.
Taksama ŭviedzieny padatak na zdabyču nafty i kalijnaj soli. Heta praduhledžana ŭkazam prezidenta № 655 ad 31 śniežnia 2014 hoda, jaki siońnia apublikavany na Nacyjanalnym pravavym internet-partale.
«Padatak za zdabyču (vyjemku) pryrodnych resursaŭ u dačynieńni da nafty i padatak za zdabyču (vyjemku) pryrodnych resursaŭ u dačynieńni da soli kalijnaj pa advałornaj staŭcy vypłačvajucca ŭ dołarach ZŠA ci jeŭra ŭ sumie, vyznačanaj z ulikam ustanoŭlenaha Nacyjanalnym bankam na dzień vypłaty aficyjnaha kursu biełaruskaha rubla ŭ adnosinach da adpaviednaj zamiežnaj valuty», — havorycca va ŭkazie.
Štokvartalna ŭ 2015 hodzie pradpryjemstvy i arhanizacyi, jakija majuć rentabielnaść za spravazdačny pieryjad bolš za 30%, zvyš minimalnaj abaviazkovaj častki prybytku, jakuju jany ŭžo vypłačvajuć u biudžet u adpaviednaści z ukazam prezidenta № 637 ad 28 śniežnia 2005 hoda, buduć adličvać jašče 30% prybytku ŭ respublikanski biudžet, adpaviednyja biudžety piarvičnaha, bazavaha i abłasnoha ŭzroŭniaŭ.
Dla AAT «Biełaruśkalij» hety padatak ustanoŭleny jašče vyšej — 55%. Pry hetym pradpryjemstvu abmiežavali pamier ułasnych srodkaŭ, jakija nakiroŭvajucca ŭ 2015 hodzie «na stvareńnie i nabyćcio asnoŭnych srodkaŭ vytvorčaha pryznačeńnia, ich rekanstrukcyju (madernizacyju, restaŭracyju), u tym liku jakija ažyćciaŭlajucca pa dahavory prostaha tavarystva, i niemateryjalnych aktyvaŭ, a taksama na pahašeńnie kredytaŭ (pazyk), atrymanych na hetyja mety». Na takija mety «Biełaruśkalij» nie moža vydatkavać bolš za 4,6 młrd. rubloŭ.
Ukaz nabyŭ moc.
