12 studzienia eks-kandydata ŭ prezidenty Biełarusi Mikałaja Statkieviča pavinny pieravieści z turmy ŭ kałoniju.
Nahadajem, u mai 2011 hoda sud Leninskaha rajona Minska pryhavaryŭ Statkieviča da šaści hadoŭ pazbaŭleńnia voli pa abvinavačvańni ŭ arhanizacyi masavych biesparadkaŭ u dzień prezidenckich vybaraŭ 19 śniežnia 2010 hoda. Pieršapačatkova apazicyjny palityk utrymlivaŭsia ŭ škłoŭskaj kałonii №17, adnak u studzieni 2012 hoda jamu zrabili bolš žorstkimi ŭmovy adbyćcia pakarańnia i pieraviali na try hady ŭ mahiloŭskuju turmu № 4. Hety termin zakančvajecca siońnia, 12 studzienia.
«U kałoniju mianie sapraŭdy pavinny pieravieści, — paviedamiŭ Statkievič u pačatku śniežnia 2014 hoda ŭ liście žurnalistu Barysu Vyrviču. — Heta pavinna adbycca 12 studzienia nastupnaha hoda, kali skončacca try hady turemnaha režymu, na jakija mianie asudzili. Tut mahli pry adsutnaści spahnańniaŭ viarnuć mianie u kałoniju i praz paŭtara hoda, ale heta nie dla «palityčnych». Z kałonii mohuć viarnuć znoŭ siudy, ale majoj pazicyi heta nie źmienić «.
Jak paviedamiła BiełaPAN žonka źniavolenaha palityka Maryna Adamovič, ranicaj 12 studzienia jana telefanavała ŭ mahiloŭskuju turmu, dzie joj paviedamili, što Statkievič znachodzicca jašče tam. Kali i kudy etapujuć muža, Adamovič nie viedaje. Pavodle jaje słoŭ, u minułyja vychadnyja Statkieviču abiacali dać mahčymaść patelefanavać dadomu, ale zvanka nie było. Adamovič taksama paviedamiła, što rodnym pavinny paviedamlać pra miescaznachodžańnie źniavolenaha ŭ trochdzionny termin paśla jaho pastupleńnia ŭ inšaje miesca pazbaŭleńnia voli.
Apošni raz Maryna Adamovič bačyła muža na karotkaterminovym spatkańni ŭ mahiloŭskaj turmie 17 śniežnia. Sustreča doŭžyłasia dźvie hadziny, razmova adbyvałasia praz škło pry dapamozie telefonnaj trubki. «Jon ni na chvilinu za čatyry hady nie daŭ mnie mahčymaści choć u čymści sumniavacca. Jon u absalutna jasnym rozumie, narmalnym nastroi, nie admaŭlajecca ad svaich pierakanańniaŭ», — skazała žonka palityka na nastupny dzień paśla spatkańnia.
58-hadovy Mikałaj Statkievič — adziny kandydat u prezidenty Biełarusi, jaki da hetaha času znachodzicca ŭ źniavoleńni. Jamu nieadnarazova prapanoŭvali napisać prašeńnie ab pamiłavańni na imia Alaksandra Łukašenki, ale jon kateharyčna admaŭlajecca heta rabić.
Tym časam Abjadnanaja hramadzianskaja partyja (AHP) pačała farmiravać inicyjatyŭnuju hrupu pa vyłučeńni Statkieviča kandydatam u prezidenty na vybarach 2015 hoda. Jak zajaviŭ na pres-kanfierencyi 6 studzienia staršynia AHP Anatol Labiedźka, heta budzie chutčej hrupa salidarnaści z palitviaźniami, da zboru podpisaŭ za vyłučeńnie sprava naŭrad ci dojdzie. «Ale my spadziajemsia, što stvareńnie inicyjatyŭnaj hrupy i jaje dziejańni nabliziać vyzvaleńnie Mikałaja Statkieviča», — skazaŭ Labiedźka.
