Mienski haradzki sud uznaviŭ kryminalnuju spravu suprać byłoha namieśnika hałoŭnaha redaktara hazety “Zhoda” Alaksandra Źdźvižkova. Jaho abvinavačvajuć u parušeńni artykułu 130 č 1. KK “Raspalvańnie relihijnaj varažniečy”. Pra heta “NN” paviedamiŭ tahačasny hałoŭny redaktar "Zhody" Alaksiej Karol. 30 śniežnia jon atrymaŭ pazoŭ źjavicca ŭ Mienski haradzki sud 11 studzienia ŭ jakaści śviedki pa hetaj spravie.
Kryminalnaja sprava suprać Źdźvižkova i hazety “Zhoda” była zaviedzienaja ŭ 2006 hodzie, napiaredadni prezydenckich vybaraŭ, za źmiaščeńni ŭ vydańni karykaturaŭ na praroka Muchameda, jakija raniej byli nadrukavanyja ŭ dackaj presie. “Zhodu” tady začynili, a skončyć spravu suprać Źdźvižkova nie zmahli, bo toj na peŭnym etapie śledztva niekudy źnik. Dzie jon znachodziŭsia da hetaj pary, nichto nia viedaje. Sud tady pastanaviŭ prypynić śledztva praz adsutnaść hałoŭnaha abvinavačanaha.
Alaksiej Karol kaža, što karykatury na Muchameda ŭ hazetu trapili z asabistaj inicyjatyvy Alaksandra Źdźvižkova. Sam Karol daviedaŭsia pra heta tolki pa vychadzie numaru, paśla čaho adrazu zabaraniŭ jaho raspaŭsiudžvać.
Alaksiej Karol kaža, što zmoh datelefanavacca ŭ Mienski haradzki sud, dzie jamu paviedamili, što Źdźvižkoŭ znachodzicca pad aryštam, ale nie ŭdakładnili ź jakoha času. Častku śviedkaŭ vyklikali na 14 studzienia.
Słuchańni pa spravie pačnucca 11 studzienia a 11 hadzinie ŭ zale Mienskaha haradzkoha suda (vuł. Dunina-Marcinkieviča, d.1, korp. 3). Pavodle hetaha artykułu Alaksandru Źdźvižkovu moža pahražać da piaci hadoŭ pazbaŭleńnia voli.
