Ministerstva infarmacyi Biełarusi praanalizuje reakcyju niekatorych biełaruskich ŚMI na terakt u redakcyi Charlie Hebdo i, u pryvatnaści, publikacyju imi karykatur francuzskaha štotydniovika ŭ znak salidarnaści z zahinułymi karykaturystami.
vitbichi.by
Pra heta zajaviła ministr infarmacyi Biełarusi Lilija Ananič padčas anłajn-kanfierencyi na sajcie ahienctva BiełTA 19 studzienia.
«Ciapier my budziem analizavać reakcyju asobnych našych srodkaŭ masavaj infarmacyi. U znak salidarnaści peŭnyja ŚMI taksama apublikavali karykatury. A ci treba było? Jakija karykatury? Dumaju, pavinna być hramadskaja acenka, hramadskaje hańbavańnie. Treba usiu ŭładu spažyć, kab nie dapuskać teraryzmu ŭ jakoj by tam ni było krainie», — skazała Ananič.
«My smutkujem pa zahinułych, my suprać teraktaŭ. Ale my ŭsie pavinny dumać pra toje, jak adhukniecca naša słova», — dadała ministr. «Kali zabivajuć ludziej — heta niedapuščalna. I ŭsio roŭna, jakimi matyvami kiravalisia terarysty. Niedapuščalny teraryzm. Ale ja zaŭsiody analizuju, što pasłužyła pryčynaj», — padkreśliła Lilija Ananič.
Jana adznačyła, što nie mieła mahčymaści adsočvać «tvorčuju dziejnaść francuzskaha štotydniovika». «Ale dumaju, što imknieńnie chadzić pa lazie naža tam prysutničała. Jak pakazała praktyka, heta skončyłasia kankretnaj ludskoj trahiedyjaj», — skazała Ananič.
U suviazi z hetym kiraŭnik Mininfarma nahadała, što ŭ 2005-2006 hadach adno ź biełaruskich ŚMI apublikavała karykatury na praroka Muchamieda. «I była vielmi žorstkaja adekvatnaja reakcyja dziaržavy. Jana była niepapularnaja ŭ peŭnym asiarodździ, adkazny za takuju publikacyju panios pakarańnie. Rašeńnie suda — try hady pazbaŭleńnia voli, jakija na praktycy vylilisia ŭ try miesiacy. Heta žorstka. Ale, ź inšaha boku, dziaržava pavinna spyniać u samym zarodku prajavy ekstremizmu», — skazała Ananič.
Havorka idzie pra pieradruk niedziaržaŭnaj hazietaj «Zhoda» karykatur na praroka Muchamieda z dackaha vydańnia Jullands-Posten. U studzieni 2008 hoda Minharsud abvinavaciŭ redaktara «Zhody» Alaksandra Zdźvižkova ŭ raspalvańni relihijnaj varožaści i prysudziŭ da troch hadoŭ pazbaŭleńnia voli ŭ kałonii ŭzmocnienaha režymu.
