U Pinsku 20-hadovy chłopiec pamior paśla ŭžyvańnia spajsu, paviedamili BiełTA va USK pa Bresckaj vobłaści.
Trup junaka byŭ znojdzieny na leśvičnaj placoŭcy šmatkvaternaha žyłoha doma ŭ mikrarajonie Łuhi. Pavodle papiarednich źviestak, śmierć nastupiła ad užyvańnia nievyśvietlenaha rečyva.
Padčas pravierki śledčyja vyjavili, što ŭ padjeździe, dzie było znojdziena cieła mužčyny, žyvie jaho znajomy, da jakoha napiaredadni i zachodziŭ małady čałaviek razam z dvuma siabrami. Dla haściej 18-hadovy junak vyrabiŭ kurylnuju sumieś. U vyniku ŭžyvańnia spajsu maładyja ludzi stracili prytomnaść. Ačuŭšysia, dvoje chłopcaŭ vyjavili, što treci pamior.
U dačynieńni da 18-hadovaha maładoha čałavieka Pinski mižrajonny adździeł SK uzbudziŭ dźvie kryminalnyja spravy: pa č.3 art.328 (zbyt asabliva niebiaśpiečnaha psichatropnaha rečyva) i č.1 st.144 (pryčynieńnie śmierci pa nieaściarožnaści) KK RB. Jon uziaty pad vartu.
