Rasija zabłakavała zajavu Rady Biaśpieki AAN, jakaja asudžała rakietnyja abstreły Maryupala.
Zajava zaklikała vykonvać pahadnieńnie ab spynieńni ahniu, pryniataje ŭ vieraśni, a taksama pravieści rasśledavańnie rakietnaha abstrełu, u vyniku jakoha zahinuli 30 čałaviek.
Pavodle źviestak ABSIE, rakietny abstreł išoŭ z pazicyj, zaniatych ŭzbrojenymi sieparatystami ŭ Danieckaj vobłaści.
«Analiz varonak pakazaŭ, što rakiety «Hrad» prylacieli z paŭnočna-ŭschodniaha napramku, z boku vioski Akciabr (19 kiłamietraŭ na paŭnočny ŭschod ad [abstralanaj] Alimpijskaj vulicy), a rakiety «Urahan» — z uschodniaha kirunku, z boku vioski Zaičanka (15 kiłamietraŭ na ŭschod ad Alimpijskaj vulicy). Abodva nasielenyja punkty kantralujucca Danieckaj narodnaj respublikaj», — skazana ŭ zajavie ABSIE.
ZŠA i ES asudzili, jak było skazana, naniasieńnie niematyvavanych udaraŭ, a taksama zaklikali Rasiju spynić akazańnie padtrymki sieparatystam.
U zajavie, tekst jakoj nie dazvoliła pryniać Rasija, asudžalisia «niadaŭnija pravakacyjnyja vykazvańni sieparatystaŭ» u suviazi z abstrełam Maryupala.
Ahienctva Rojterz udakładniaje sa spasyłkaj na kopiju čarnavika dakumienta, što havorka išła ab zajavie kiraŭnika samaabvieščanaj DNR Alaksandra Zacharčanki, u jakim toj abviaściŭ nastup na Maryupal.
Misija Rasii ŭ AAN zajaviła, što dakumient byŭ zabłakavany rasijskimi dypłamatami, bo ŭ im asudžalisia tolki siły sieparatystaŭ, i nie byŭ zhadany ŭrad Ukrainy.