fota Siarhieja Zinina
Libieralnaje rasijskaje vydańnie Viedomosti, jakoje pryznała Alaksandra Łukašenku čałaviekam 2014 hoda, siońnia źmiaściła kałonku «ad redakcyi» pad nazvaj «Bitva za Biełaruś».
«Łatvija, jakaja staršynstvuje ŭ ES, imkniecca ŭmacavać adnosiny Biełarusi i Jeŭrasajuza. Dziaržsakratar MZS Łatvii Andrejs Piłdehovičs pravioŭ u Minsku pieramovy ź biełaruskim kaleham Uładzimiram Makiejem i zajaviŭ, što Biełaruś pavinna ŭ budučyni stać siabram Rady Jeŭropy. Łatvija choča i refarmavać prahramu «Uschodniaha partniorstva» (u joj udzielničaje i Biełaruś), kab nablizić jaje da intaresaŭ partnioraŭ. Abmiarkoŭvajecca pytańnie spraščeńnia vizavaha režymu dla biełarusaŭ», — piša vydańnie.
U toj ža čas, źviartajuć uvahu «Viedomosti», paśla vizitu Piłdehovičsa ŭ Minsk u niekalkich rasijskich ŚMI źjavilisia materyjały pra «biełaruskich fašystaŭ», nastupie na ruskuju movu ŭ Biełarusi i h.d.
«Niešta padobnaje było i ŭ śniežni, kali Alaksandr Łukašenka aktyŭna krytykavaŭ Rasiju za pieraškody ŭ pastaŭkach praduktaŭ (rasijskaja mytnia nie davała biełarusam abyjści praduktovaje embarha), sustrakaŭsia ŭ Kijevie z Parašenkam i abiacaŭ jamu ŭsialakuju dapamohu. Zatym, zrešty, Łukašenka pryjechaŭ u Maskvu i abiacaŭ «padstavić plačo» Rasii».
«Kurs Jeŭropy na paciapleńnie adnosinaŭ ź Biełaruśsiu vyklikany i spałochanaściu pierad niepradkazalnaj Rasijaj, i pasrednickaj rolaj Minska va ŭkrainskim kanflikcie. Łatvii chočacca siabie prajavić u čas staršynstva ŭ ES.
A Łukašenka zaŭsiody caniŭ mahčymaść hulać na supiarečnaściach Zachadu i Rasii. Siońnia staŭki ŭ hetaj hulni vialikija, jak nikoli», — zaznačaje vydańnie i dadaje: «U 2015 h. projduć vybary prezidenta Biełarusi, na jakich Łukašenka pryvyk pieramahać. Siońnia jon nie moža adčuvać siabie zanadta ŭpeŭniena.
Hałoŭny sajuźnik Rasija — u ekanamičnym kryzisie i žorstkim supraćstajańni z Zachadam, da taho ž pakazała siabie absalutna niepradkazalnaj u adstojvańni svaich intaresaŭ na susiedniaj Ukrainie. Maskva moža nie tolki pierastać datavać biełaruskuju ekanomiku (jakaja taksama ŭ kryzisie), ale i radykalizavać svaje sajuznyja patrabavańni da Minska, naŭzamien pahražajučy prablemami na vybarach: palityčny i miedyjainstrumientaryj dla hetaha jość.
«Baćka» jašče letaś pačaŭ prapahandu biełaruskaj identyčnaści. U vojsku idzie pierabudova z uporam na mabilnyja vojski, zamienieny ministr abarony. Zaraz pravodziacca maštabnyja vajskovyja vučeńni. U novaj redakcyi zakona «Ab vajennym stanoviščy» pašyrany padstavy dla jaho ŭviadzieńnia, žorstkim staŭ sam režym, pašyranyja padstavy dla ŭžyvańnia siły i zbroi.
U lubym vypadku Łukašenka sprabuje zastrachavacca ad niečakanaściaŭ.
Nakolki ŭ hetaj situacyi jon zmoža rušyć napierad u supracoŭnictvie ź ES — vialikaje pytańnie, i nie tolki da jaho, ale i da Uładzimira Pucina, reziumujuć «Viedomosti».
