Žycharku horada Viaźma Smalenskaj vobłaści źmiaścili ŭ SIZA «Lefortava» paśla zaviadzieńnia kryminalnaj spravy pa fakcie dziaržaŭnaj zdrady na karyść Ukrainy. Śviatłanu Davydavu aryštavali za paviedamleńnie ab mahčymaj adpraŭcy rasijskich vojskaŭ va Ukrainu.
U krasaviku 2014 hoda Davydava patelefanavała va ŭkrainskaje pasolstva i paviedamiła, što vajskovaja čaść niepadalok ad jaje doma apuścieła. U čaści №48886 dysłakujecca 82-ja asobnaja radyjotechničnaja Čyrvonaściažnaja ordena Alaksandra Nieŭskaha bryhada HRU.
«Jana pajechała ŭ centr pa spravach i ŭ maršrutcy ŭbačyła adnaho z słužačych hetaj čaści. Zrazumieć, što jon adtul, było niaciažka: jon na ŭsiu maršrutku pa telefonie pra heta raspaviadaŭ», — raspavioŭ muž aryštavanaj Anatol Horłaŭ.
Horłaŭ pierakazaŭ źmiest hetaj hutarki: nibyta mužčyna kazaŭ, što jaho z kalehami «nievialikimi hrupami pierapraŭlajuć u Maskvu, abaviazkova ŭ cyvilnym, a adtul dalej u kamandziroŭku». Śviatłana Davydava pryjšła da vysnovy, što vajskoŭcaŭ adpraŭlajuć u Danieck.
Zatrymali Śviatłanu Davydavu 21 studzienia.
«U vočka ja ŭbačyŭ našaha ŭčastkovaha. Jon praź dźviery skazaŭ, što na nas skardziacca susiedzi. U nas siamiora dziaciej, ale častka da taho momantu syšła ŭ škołu, a častka jašče spała», — raspaviadaje muž aryštavanaj.
Zamiest ŭčastkovaha ŭ kvateru ŭvarvalisia ludzi ŭ čornym kamuflažy, a mužčyna ŭ cyvilnym, jaki zajšoŭ śledam, pakazaŭ paśviedčańnie śledčaha pa asabliva važnych spravach 1-ha adździeła śledčaha ŭpraŭleńnia FSB RF pałkoŭnika justycyi Michaiła Śvinałupa.
Śledčy Śvinałup zajaviŭ Śviatłanie Davydavaj, što jana zatrymanaja pa spravie №221-601, zaviedzienaj pa artykule 275 KK RF («Dziaržaŭnaja zdrada»). Paśla pieratrusu supracoŭniki FSB vynieśli z chaty ŭsio zapisnyja knižki, kampjutar i noŭtbuk. Praź dzień muž Śviatłany Davydavaj daviedaŭsia, što jana etapavanaja ŭ Maskvu, dzie Lafortaŭski rajonny sud vybraŭ joj mieru strymańnia ŭ vyhladzie zaklučeńnia pad vartu.
U pres-słužbie FSB Kommiersantu nie zmahli apieratyŭna adkazać na zapyt pa hetaj spravie
