Zhoda Uładzimira Pucina na Minskija damoŭlenaści pastaviła rasijskuju prapahandu pierad ciažkaj zadačaj. Doŭhi čas maskoŭskija sajty trubili pra chutkuju pieramohu «apałčencaŭ» nad «kijeŭskaj chuntaj». «DNR» i «ŁNR» majuć bolš vajskovaj techniki, čym bolšaść jeŭrapiejskich dziaržaŭ. Ale minuŭ hod, a pieramoha ŭsio jašče nie nastupiła.
Tamu ŭ internet była zapuščana kačka pra nibyta zajavu nataŭskaha hienierała pra hatoŭnaść nanieści avijaŭdary pa «Navarosii».
«Na dniach stała viadoma, što kali mir na Danbasie nie nastupić, to avijacyja NATA ŭ najbližejšyja dva-try tydni naniasie masavyja avijacyjnyja ŭdary pa parušalnikach mirnaha płana. Pra mahčymaść takoha ŭdaru ŭčora ŭ Miunchienie zajaviŭ kamandujučy siłami NATA ŭ Jeŭropie Filip Brydłaŭ», — pišuć rasijskija impierskija sajty.
Na praŭdzie nijakich padobnych zajavaŭ Brydłaŭ nie rabiŭ. Ale voś što pišuć rasijskija partały.
«Aficyjna avijacyja NATA, jak i ŭ byłoj Juhasłavii, budzie atakavać pazicyi vojskaŭ, jakija nie spyniajuć bajavych dziejańniaŭ, a realna bolš za 95% «kropkavych» udaraŭ prypaduć na siły apałčeńnia i tolki kala 5% pa padraździaleńniach Ukrainy, jakija nie vykonvajuć zahadaŭ centralnaha kamandavańnia («Pravy siektar» i niekatoryja dobraachvotnickija bataljony). Zadača sił NATA — stvaryć vyrašalny pieravaha na palach bitvy, ačyścić Danbas ad «terarystaŭ» i ŭzmacnić centralnuju prezidenckuju ŭładu Parašenki».
A što ž Rasija? Pucin akazaŭsia pierad składanym vybaram, piša prapahanda
«Što moža ŭ hetym vypadku zrabić Rasieja? U pryncypie, praktyčna ničoha. Pa šmatlikich zajavach Uładzimira Pucina i inšych aficyjnych asob Rasija nie źjaŭlajecca bokam kanfliktu i tamu avijaŭdar NATA pa pazicyjach apałčencaŭ nielha budzie razhladać jak vajennyja dziejańni suprać Rasii. Nie vajnu ž abjaŭlać, — praciahvaje aŭtar. — Zaraz va Uładzimira Pucina dosyć składanaja dylema: abo addać Danbas na razarvańnie ŭzbrojenym siłam Ukrainy i NATA abo apiaredzić amierykancaŭ i ŭvieści vojski (pryznać DNR i ŁNR), ale tym samym vyklikać novuju mahutnuju chvalu sankcyj i dalejšy škvał krytyki Rasii. I toje, i inšaje vielmi drenna. U bližejšy čas my ŭbačym, ci zmoža Prezident Rasii znajści hodny vychad z pastaŭlenaj jamu pastki».
Kaniečnie, padpisańnie pieramirja ŭ takich umovach zdajecca nie vynikam słabaści rasijskaj ekanomiki, a mudrym dasiahnieńniem kiraŭnika Rasii.
