Alaksandr Žučkoŭski, viadomy «daniecki apałčeniec» z rasijskim pašpartam i publicyst, jakoha drukujuć mnohija rasijskija vydańni, raspavioŭ pra svajo staŭleńnie nie tolki da Ukrainy, ale i da biełaruskaj dziaržaŭnaści.
«Mahčyma, Strałkoŭ… vymušany prytrymlivacca «palitesu» i nie moža dazvolić sabie poŭnuju svabodu mierkavańniaŭ. Ja ž «asoba nieaficyjnaja, a mahčyma i hultajskaja», tamu mahu kazać naŭprost, što jak rasijski nacyjanalist-impieryjalist, jak vialikaros hladžu na BU (Biełaruś i Ukrainu) jak na niedarečnaść, z pahardaj», — napisaŭ Žučkoŭski ŭ svaim Facebook.
Žučkoŭski — papularny rasijski błohier i žurnalist, artykuły jakoha pieradrukoŭvajucca jak anłajn-ŚMI šavinistyčnaj skiravanaści, takimi jak «Sputnik i pohrom», hetak i prosta prapucinskimi apn.ru, rus-obr.ru, vz.ru.
Ź viasny 2014 hoda jon byŭ va Ukrainie, vajavaŭ suprać ukrainskaj armii i źbiraŭ u RF materyjalnuju dapamohu dla bajevikoŭ.
«Dziaržavami BU ź niezaležnaściu i «movami» hłyboka pahardžaju… Čamu my pryznajem miežy, jakija narezali kamunisty, i surjozna kažam pra BU?», — dadaje Žučkoŭski ŭ tym ža dopisie.
«Tak, jość takija dziaržaŭki, Ukraina i Biełaruś. Adnoj kiruje ŭkrainiec Parašenka, druhoj kiruje ŭkrainiec Łukašenka. Chodziać ciapier paraj u Minsku, pieramirhvajucca i hihikajuć za śpinaj u Pucina», — źniavažliva piša bajavik-prapahandyst (cytujem tolki nievialičkuju častku vypadaŭ).
Łukašenka i Parašenka, biełaruskija i ŭkrainskija ŭradoŭcy nachabna atrymlivajuć asałodu ad taho, što byccam by razmaŭlajuć z Rasijaj na roŭnych, ličyć Žučkoŭski.
«Chto na roŭnych? Što na roŭnych? Panski kaścium naciahnuli i dumajuć pra siabie nieviadoma što. Jany pavinny ŭ Miunchienie, Minsku i paŭsiul chadzić i Łaŭrovu ŭ vočy zahladvać, adhadvać, što dumaje i choča pan», — zaklučaje jon, nazyvajučy chałopami tych, chto «dzielić Rasiju na RSFSR, USSR i BSSR».
U Biełarusi «DNR» i inšych prarasijskich maryjanietak padtrymlivajuć takija resursy jak «Zapadnaja Ruś» i imperiya.by. Pry hetym hałoŭnaha redaktara «Zachodniaj Rusi» Ihara Zielankoŭskaha Vadzim Hihin pieryjadyčna zaprašaje vystupać na biełaruskim telebačańni.
