U ekzataryumie — domie dla ekzatyčnych žyvioł Paŭdniovaj Amieryki — raźmieścicca novaja ekspazicyja «Arynoka». Tut naviedvalniki zaaparka ŭbačać unikalnych małpaŭ (sajmiry, tamarynaŭ, kapucynaŭ), niezvyčajnych reptylij (vodnych čarapach, krakadziłavych kajmanaŭ, redkich źmiej), ekzatyčnych marskich i presnavodnych ryb, trapičnych ptušak (tukanoŭ, papuhajaŭ ara), a taksama mlekakormiačych (jahuaraŭ, pum, acełotaŭ, učepistachvostych dzikabrazaŭ, kapibar, listanosaŭ-akularnikaŭ) i inšych cikavych žyvioł.
U novym kompleksie jość i adkrytyja vuličnyja valjery, i ŭnutranyja pamiaškańni dla ŭtrymańnia žyvioł u chałodnuju paru hoda. Unutry paviljona stvorany mikraklimat, blizki da pryrodnaha, charakternaha dla subtropikaŭ. U valjerach šmat vadajomaŭ, jość lažanki z padahrevam. U centry ekspazicyi - siamimietrovy vadaspad.
Interjery ekzataryuma vyrableny ŭručnuju pa asablivych technałohijach, jany ŭpryhožany raślinami, kalarovymi maskami indziejcaŭ, draŭlanymi rytualnymi skulpturami. Źviartaje na siabie ŭvahu elemient dekaracyi na druhim paviersie - tuziemnaja piroha, pobač - viasło i kałčan sa strełami. Usio ŭ interjery pradumana, navat padłoha na abodvuch uzroŭniach ekspazicyi nahadvaje patreskanuju ad zasuchi buruju hlebu.
Nazirać za žyviołami ekzataryuma naviedvalniki zmohuć z naziralnych placovak, raźmieščanych na roznych uzroŭniach. U kompleksie šklany dach, śpiecyjalnaje śvietłavoje abstalavańnie i sistema kandycyjaniravańnia, tamu i haspadaram - ekzatyčnym žyviolinam, i naviedvalnikam, jakija pryjduć na ich pahladzieć, budzie tut kamfortna.
