Dziarždepartamient ZŠA admianiŭ sankcyi ŭ dačynieńni da pradpryjemstva «Biełarusnafta», što dziejničali z 29 sakavika 2011 hoda.
belorusneft.by
Adpaviednaje rašeńnie za podpisam pamočnika dziaržsakratara ZŠA pa pytańniach ekanomiki i biźniesu Kurta Tonha apublikavanaje ŭ Fiederalnym rehistry
«Dziaržaŭny sakratar pryniaŭ rašeńnie źniać sankcyi, nakładzienyja ŭ adpaviednaści z Aktam ab sankcyjach ŭ dačynieńni da Irana 1996 hoda, z respublikanskaha ŭnitarnaha pradpryjemstva «Biełarusnafta» ŭ suviazi z tym, što kampanija bolš nie zajmajecca dziejnaściu, jakaja traplaje pad sankcyjnyja abmiežavańni, a taksama atrymanyja harantyi, što nie budzie zajmacca takoj dziejnaściu ŭ budučyni. Takim čynam, niekatoryja sankcyi, uviedzienyja ŭ dačynieńni da «Biełarusnafty» 29 sakavika 2011 hoda, bolš nie dziejničajuć», — havorycca ŭ dakumiencie.
***
Sankcyi na «Biełarusnaftu» byli nakładzienyja Dziarždepartamientam ZŠA ŭ sakaviku 2011 hoda z suviazi z kantraktam biełaruskaha pradpryjemstva ź iranskaj kampanijaj NaftIran Intertrade.
«Złučanyja Štaty prymajuć dadatkovyja miery dla ŭzmacnieńnia nacisku na Iran za jaho admovu vykanać svaje mižnarodnyja abaviazacielstvy ŭ suviazi ź jadziernaj prahramaj, — havaryłasia ŭ paviedamleńni Dziarždepartamienta. — Adzin z klučavych elemientaŭ našaj stratehii fakusujecca na iranskich mahutnaściach pa zdabyčy nafty i hazu, jakija, jak pryznajecca ŭ rezalucyi Savieta biaśpieki AAN № 1929, Iran vykarystoŭvaje dla finansavańnia svajoj dziejnaści pa raspaŭsiudžvańni [jadziernaj zbroi], a taksama dla maskiroŭki impartu tavaraŭ dvajnoha pryznačeńnia».
«U miežach hetaj stratehii Dziarždepartamient uvioŭ sankcyi ŭ dačynieńni da biełaruskaj dziaržaŭnaj enierhietyčnaj kampanii «Biełarusnafta» ŭ adpaviednaści z Zakonam ab sankcyjach da Irana 1996 hoda, dapoŭnienym Zakonam ab usioabdymnych sankcyjach da Irana, pryciahnieńni da adkaznaści i dyviestavańni 2010 hoda, — za jaje ŭdzieł u iranskim naftavym siektary», — adznačałasia ŭ paviedamleńni Dziarždepa.
Dziarždepartamient, u pryvatnaści, ustanaviŭ, što ŭ 2007 hodzie VA «Biełarusnafta» zaklučyła kantrakt na 500 młn. dołaraŭ ZŠA ź iranskaj NaftIran Intertrade Company dla raspracoŭki naftavaha radovišča Džafiejr. Zakon 1996 hoda praduhledžvaje nakładańnie sankcyj na kampanii, jakija inviestujuć bolš za 20 młn. dołaraŭ.
