Pjetra Paralin voźmie ŭdzieł u šerahu sustreč na samym vysokim uzroŭni i ŭznačalić śviatuju imšu.
Siońnia pačynajecca aficyjny vizit u Biełaruś kardynała Pjetra Parolina, Dziaržaŭnaha sakratara Papy Franciška. Kardynał budzie znachodzicca ŭ Biełarusi pa 15 sakavika, paviedamlaje sajt catholic.by.
Dziaržsakratar — heta kiraŭnik dypłamatyi Vatykana.
Dziaržsakratar aśviacić pieršy kamień novaha budynka Apostalskaj Nuncyjatury ŭ Minsku, voźmie ŭdzieł u šerahu sustreč na samym vysokim uzroŭni. Taksama kardynał Pjetra Parolin naviedaje miždyjacezijalnaje načnoje čuvańnie moładzi, jakoje projdzie 14—15 sakavika ŭ minskim kaściole Śviatych Symona i Aleny.
15 sakavika kardynał uznačalić śviatuju Imšu z udziełam dziaciej u minskim archikatedralnym kaściole Imia Najśviaciejšaj Panny Maryi.
Pjetra Paralin byŭ pasiarednikam u pieramovach ZŠA i Kuby, jakija pryviali da adnaŭleńnia dypłamatyčnych adnosin miž dźviuma krainami. Jon taksama rabiŭ sprobu pasiarednictva na pieramovach miž Nikałasam Madura i vieniesuelskaj apazicyjaj, jakija vyniku nie dali.