Były aficer KDB Juryj Šviec na słuchańniach pa spravie ab zabojstvie Litvinienki paviedamiŭ, što jaho tavaryša mahli zabić z-za infarmacyi ab tym, jak Pucin u 90-ch hadach «kryšavaŭ» admyvańnie hrošaj kałumbijskaha narkakartela, paviedamlaje Bi-bi-si.
Havorka idzie pra ŭžo zhadanaje na słuchańniach daśje na Viktara Ivanova, ciapierašniaha dyrektara Fiederalnaj słužby pa kantroli za abarotam narkotykaŭ i adnoj z davieranych asob prezidenta Rasii Uładzimira Pucina. Hety dakumient byŭ składzieny Juryjem Šviecam u vieraśni 2006 hoda pa zamovie Alaksandra Litvinienki dla kampanii Titon.
Šviec śćviardžaje, što ŭklučyŭ u heta daśje infarmacyju pra suviazi Pucina i Ivanova z tak zvanaj Tamboŭskaj AZH, jakaja, u svaju čarhu, u 90-ch hadach zajmałasia narkahandlem i admyvańniem hrošaj adnaho z kałumbijskich narkakartelaŭ.
Na dumku Švieca, heta daśje nie tolki stała pryčynaj zryvu važnaj kamiercyjnaj ździełki ad jakoj Viktar Ivanoŭ, nibyta, płanavaŭ asabista atrymać 10-15 młn dołaraŭ u vyhladzie «adkatu», ale i mahło surjozna zaniepakoić samoha Uładzimira Pucina.
Hramadskaje rasśledavańnie, abo, jak jano nazyvajecca aficyjna, adkrytaje daznańnie pa fakcie śmierci Alaksandra Litvinienki, pravodzicca pa rašeńni Vysokaha suda, jaki takim čynam zadavoliŭ prašeńnie ŭdavy Alaksandra Litvinienki, Maryny.
Hałoŭnaja meta rasśledavańnia — adkazać na pytańnie, ci byli rasiejskija ŭłady datyčnyja da hibieli Litvinienka.
Juryj Šviec vyklučyŭ vierahodnaść taho, što Alaksandr Litvinienka ci ŭvohule chto-niebudź za miežami Rasii moh być zabity rasijskimi śpiecsłužbami biez adabreńnia vyšejšaj pradstaŭnika ŭładaŭ, jakim u Rasii źjaŭlajecca Uładzimir Pucin.
«Heta praviła KDB numar adzin — prykryć svaju śpinu. A prykryć svaju śpinu možna tolki atrymaŭšy dabro ad svajho načalnika. Asabliva ŭ Rasii, dzie jany kažuć ab pabudovie viertykali ŭłady, dzie jość tolki adzin adziny bos, jaki prymaje ŭsie važnyja rašeńni», — patłumačyŭ Šviec.
«Luby hienierał, uklučajučy spadara Ivanova abo luboha inšaha hienierała FSB, pierad tym, jak addać zahad ab likvidacyi Sašy ci kaho zaŭhodna jašče ŭ Rasii ci za jaje miežami, spačatku zabiaśpiečyć sabie prykryćcio 00 na ŭsialaki vypadak», — dadaŭ śviedka.
Šviec sam siabie apisvaje jak adnakurśnika Uładzimira Pucina.
«Tolki Pucin apynuŭsia ŭ liku adnaho pracenta niaŭdačnikaŭ na kursie, jakich pryznali niahodnymi dla słužby ŭ źniešniaj raźviedcy», - dadaŭ Šviec.
