Za chvilinu chady ad płoščy Łukiški, na druhim paviersie doma pa adrasie Jasinskaha, 1 raźmiaściłasia ŭtulnaja «kašačaja» kaviarnia. Jana adkryłasia paŭhoda tamu, ale ŭžo dobra znajomaja turystam.
Kaviarnia paznajecca zdalok pa malunkach na ścienach i voknach. Stvaralniki kaviarni kažuć, što tyja malunki, jak i amal usio azdableńnie pamiaškańnia, rabili svaimi siłami.
U Cat Cafe pachnie zusim nie tak, jak u kvatery stereatypnaj «cat lady». Na leśvicy ŭ kaviarni chiba źlohku pachnie chłorkaj — padłohi tut myjuć štodzień, raz na tydzień pravodziać vialikuju dezinfiekcyju.
Jak kažuć stvaralniki, vilenskaje Cat Cafe druhoje ŭ Jeŭropie pa kolkaści puchnataha nasielnictva.
U kaviarni naviednika sustrenuć 12 katoŭ. Ci nie sustrenuć. Katy — žyvioły volnyja, ich nie prymusiš zabaŭlać naviednika. Da ludziej katy staviacca spakojna, biez bojazi, na stoł naviednikam nie zaskokvajuć.
Usie žyvioły traplajuć u Cat Cafe z prytułkaŭ, adbirajucca samyja miralubivyja i niepužlivyja. Kanfliktnych situacyj miž ludźmi i katami za čas isnavańnia kaviarni nie zdarałasia.
U chutkim časie da tuzina chvastataha piersanału dałučycca trynaccaty kot, ciapier jon adaptujecca da žyćcia siarod mnostva dvu- i čaćvieranohich.
Cat Cafe zasnavali (źleva naprava na fota) Romas Žvirblis, Taŭtvidas Bicinas, Jahor Raščynski i Alaksiej Rudźko. Apošnija dva — biełarusy.
Ideju chłopcy padhledzieli ŭ Budapiešcie, kudy «kašečyja kaviarni» trapili ź Japonii. Žorstkija normy abmiažoŭvajuć mahčymaść dla japonskich haradžan trymać katoŭ u svaich damach, tamu dozu adnosinaŭ z žyviołami davodzicca zdabyvać u admysłovych ustanovach.
Zasnavalniki vilenskaha Cat Cafe trapili jakraz u «pik katoŭ» — padobnyja kaviarni ŭ chutkim časie adkrylisia ŭ Finlandyi, Estonii i Łatvii.
«Byli źbieražeńni, byli praca, mary», — tłumačyć Alaksiej. Była ideja adkryć kaviarniu ŭ Minsku. Dy ŭ Biełarusi prosta nie było (i niama) zakanadaŭstva, što rehulavała by ŭtrymańnie žyvioł u kaviarniach.
Z zakonami dapamoh mer Vilni, ź finansavańniem — fondy padtrymki biźniesu.
U Biełarusi, naprykład, niama zakona, jaki dazvalaje ci zabaraniaje trymać žyvioł u kaviarni. U Vilni, prynamsi, byŭ zakon, jaki takoje zabaraniaŭ.
«Užo praściej», — tłumačyć Jahor. Chłopcy źviarnulisia naŭprost da mera Vilni, asabistaja sustreča była pryznačanaja ŭžo praz try dni. Źmieny ŭ zakanadaŭstvie byli nieŭzabavie pryniatyja, byli dakładna prapisanyja sanitarnyja normy.
Na adkryćcio kaviarni chłopcy ŭziali admysłovy kredyt u inviestycyjnaj kampanii Invega. Pry padačy nadziejnaha biźnies-płana kampanija pakryvaje adsotki pa kredycie, faktyčna pieratvaraje jaho ŭ rasterminoŭku.
«Ale my nie biźniesoŭcy, ź pieršaha razu nam admovili», — śmiajecca Alaksiej. Razam z ekanamistam pryjšłosia pierapisvać biźnies-płan, uklučać u jaho chiba ceny na kožny videlec. Ale hrošy na adkryćcio (jakija praktyčna całkam syšli na ramont) byli atrymanyja. Ź inšaj prahramy padtrymki biźniesu navat byli kampiensavanyja zarpłaty niekatorym supracoŭnikaŭ na pieršy hod pracy.
Prablemy byli z pamiaškańniem. Arendadaŭcy hladzieli na tych, chto choča prynieści žyvioł u ich pamiaškańni, jak na «troški crazy».
Chvalavalisia nie tolki z-za mahčymaj antysanitaryi ci skarhaŭ susiedziaŭ — niekatoryja navat dumali, što katy papsujuć bietonnyja ścieny.
Pamiaškańnie znajšłosia tolki na druhim paviersie, ale ŭ tym zasnavalniki navat bačać plus. «Heta jak paddašša, a katy lubiać zabiracca pavyšej», — kaža Jahor.
Zaraz adzinaje, praz što sumujuć uładalniki Cat Cafe — nizkija zarobki supracoŭnikaŭ. Chaciełasia by płacić bolš, pryznajuć jany. Dy ŭ Vilni vysokaja kankurencyja.
Ceńniki treba trymać takim čynam, kab za vizit čałaviek pakidaŭ u kaviarni ŭ siarednim 3-4 jeŭra (maksimum 3 jeŭra ŭ horadzie kaštuje kompleksny abied). Jak kažuć uładalniki kaviarni, ceny ŭ ich vyšej na 5% za papularnuju sietku Čili Pizza.
Płatu za adzin tolki ŭvachod (jak u muziej) jany brać nie chočuć — dy i nie mohuć harantavać, što katy buduć zabaŭlać naviednika, a nie spać u ciomnych zakutkach. Da kankurencyi i cen dadajucca vydatki na samich katoŭ — korm, vieterynary, pryščepki, uborka i dezinfiekcyja.
U Minsku za naviednikaŭ tak nie zmahajucca, kažuć uładalniki Cat Cafe. «Banalnaja tema Biełarusi — servis, jaho prosta niama», — kaža Alaksiej. Biełarusy ŭsprymajuć restaranny biźnies jak «prosta pradać ježu».
Mnohija ŭ Biełarusi prahnuć zarabić šmat za karotki čas. Ale natykajucca na zamknionaje koła: vysokija ceny praz darahuju arendu i inšyja vydatki — mała rehularnych naviednikaŭ — jašče vyšejšyja ceny.
Alaksiej kaža, što chacieŭ by vieści biźnies u Minsku, ale nie moža. Pryčyny taho — nie tolki ceny. «Biełaruś niepradkazalnaja ŭ płanie zakanadaŭstva, — uzhadvaje jon zakryćci pradpryjemstvaŭ Minhandlem. — A z katami nielha tak voś adrazu zakrycca. Nie na vulicu ž ich vykidać!».
«Praściej adkrycca nie ŭ Minsku, a choć u Šviecyi — tam stabilnaść», kaža jon.
Ale cikaŭnaść da idei kacinaj kaviarni ŭ Biełarusi jość — stvaralnikam vilenskaha Cat Cafe pisali i ź Minsku, i z Hrodna. Pa kansultacyi taksama źviartalisia maskvičy — kacinaja kaviarnia chutka źjavicca i ŭ stalicy Rasii.
U samoj ža Vilni cikaŭnaść da Cat Cafe dastatkova vysokaja — asabliva z ulikam taho, što rekłamny biudžet kaviarni dazvalaje chiba trochi «pijarycca» ŭ Facebook.
Ale da samoj kaviarni źjaŭlajucca rekłamnyja prapanovy — naprykład, nieŭzabavie puchnatyja supracoŭniki Cat Cafe stanuć rekłamnym tvaram robataŭ-pyłasosaŭ.
«Idzie ŭsio pacichu, pracujem», — kaža z zadavolenaj uśmieškaj Alaksiej.
U płanach Cat Cafe — novyja stravy ŭ mieniu, biaspłatnyja sustrečy ź vieterynaram, ranišniaja joha z katami i ludźmi-instruktarami.
