Siońnia ranicaj Rada Ruchu «Za Svabodu» raspaŭsiudziła svaju zajavu pra farmat udziełu ŭ prezidenckaj kampanii 2015 hodu. Pryvodzim jaje całkam.
«Rada Ruchu «Za Svabodu» sa škadavańniem kanstatuje, što navat hłyboki ekanamičny kryzis u Biełarusi i pahroza dla suvierenitetu krainy z boku Rasii nie spryčynilisia da kansalidacyi demakratyčnych siłaŭ Biełarusi ŭ imia niezaležnaści, demakratyi, rynkavaj ekanomiki i jeŭrapiejskaha vybaru.
Na vialiki žal, brak adkaznaści i damovazdolnaści da siońniašnaha dnia nie dazvolili pryniać praceduru vyznačeńnia adzinaha kandydata ŭ prezidenty ad demakratyčnych siłaŭ.
Ličym, što pachod na vybary asobnymi kałonami dezaryjentuje prychilnikaŭ pieramienaŭ i pahłybić apatyju ŭ hramadstvie. Imitacyja ŭdziełu ŭ vybarčym palityčnym pracesie z zahadzia pradkazalnym finałam moža adšturchnuć ludziej ad demakratyčnych siłaŭ.
Ad momantu stvareńnia Ruch «Za Svabodu» staviŭ za metu pašyreńnie patryjatyčnych i prajeŭrapiejskich nastrojaŭ, farmavańnie krytyčnaj masy hramadzianaŭ, jakija ŭ stanie realna adstajać niezaležnaść i demakratyčny vybar Biełarusi. My i nadalej budziem dziejničać dziela jaje dasiahnieńnia, nie abmiažoŭvajučysia ramkami vybarčaj kampanii.
Ruch «Za Svabodu» zajaŭlaje, što ŭstrymlivajecca ad vyłučeńnia svajho kandydata i padtrymki inšych kandydataŭ padčas prezidenckaj kampanii 2015 hodu. Arhanizacyja skancentrujecca na raspracoŭcy prapanovaŭ ekanamičnych reformaŭ u ramkach «Narodnaj prahramy», inicyjatyvie dziela mirnych pieramienaŭ «Narodny refierendum», a taksama na kampanijach pa nazirańni za chadoj vybaraŭ i za vyzvaleńnie palityčnych viaźniaŭ».
Raniej havaryłasia, što Ruch «Za Svabodu» moža vyłučyć svajho lidara Alaksandra Milinkieviča ci jaho namieśnika Alesia Łahvinca. Apošnim časam Ruch aktyŭna ŭdzielničaŭ u kaalicyi «Narodny refierendum», jaki, najchutčej, padtrymaje pradstaŭnicu «Havary praŭdu» Taćcianu Karatkievič.
