Kaardynatar arhkamiteta pa stvareńni partyi «Biełaruskaja chryścijanskaj demakratyi» pa Mahiloŭskaj vobłaści Taisija Kabančuk paviedamiła «NN», što ad palitviaźnia Jaŭhiena Vaśkoviča daŭno nie prychodziać listy. Kabančuk raskazała, što Vaśkoviču było nakiravana mnoha paštovych adpraŭleńniaŭ, ale na nivodnaje jon nie adkazaŭ.
«Zvyčajna Jaŭhien adkazvaje na ŭsie listy. U minułym hodzie padčas akcyi «Paštoŭka palitviaźniu» my na vulicy razdavali paštoŭki, prasili ich padpisać i dasłać. Chtości padpisaŭsia «prosta minak». Dyk tady ŭ ofis BCHD pryjšoŭ adkaz ad Vaśkoviča z padziakaj «prosta minaku» za vinšavańnie.
Adnak u hetym hodzie listoŭ ad Vaśkoviča niama. Na dzień naradžeńnia Jaŭhiena [26 lutaha] jamu mnoha chto pisaŭ, ale nichto pakul nie paćvierdziŭ, što pryjšoŭ ad jaho list, bo infarmacyjaj pra listy ad palitviaźniaŭ my abmieńvajemsia. Maci Jaŭhiena pierad dniom naradžeńnia jeździła da jaho na spatkańnie, pieradavała, što ŭ Jaŭhiena ŭsio dobra i jon pieradavaŭ usim pryvitańni», — raskazała Taisija Kabančuk.
Maci Jaŭhiena Vaśkoviča Rušanija kaža, što joj listy ad syna prychodziać:
«Raz-dva na miesiac Jaŭhien piša, jon zaniaty, pracuje, času niama asabliva pisać. Piša, što ŭ jaho ŭsio dobra, jon pracuje. Sa zdaroŭjem taksama niama asablivych prablem, tolki alerhija časam zdarajecca. Viedajecie, pylna tam… 17 krasavika pajedu na karotkaje spatkańnie ź im».
Taksama Rušanija Vaśkovič adznačyła, što Jaŭhien paćviardžaŭ atrymańnie dasłanych jamu listoŭ.
Jaŭhien Vaśkovič byŭ zatrymany 17 studzienia 2011 h., asudžany ŭ mai 2011 razam z Arciomam Prakapienkam i Paŭłam Syramałotavym da 7 hadoŭ źniavoleńnia pavodle abvinavačańnia ŭ sprobie padpału dźviarej babrujskaha adździaleńnia KDB.
