Jak paviedamlajuć ispanskija ŚMI, vučań adnoj sa škoł Barsiełony, uzbrojeny arbaletam i nažom, zastreliŭ nastaŭnika i paraniŭ čatyroch čałaviek.
Nakolki viadoma, heta pieršy ŭ historyi Ispanii vypadak zabojstva nastaŭnika vučniem.
Incydent adbyŭsia ŭ škole im. Žuana Fust dla vučniaŭ 12-16 hadoŭ, raźmieščanaj u barsiełonskim rajonie Ła-Sahriera. Chłopčyk byŭ uzbrojeny arbaletam i nažom, kali ŭ paniadziełak ranicaj jon pryjšoŭ na ŭrok.
Uvajšoŭšy ŭ kłas, jon paraniŭ nastaŭnicu i jaje dačku, jakaja vučyłasia ŭ hetaj ža škole. Jak paviedamlajecca, pačuŭšy kryki, inšy nastaŭnik zajšoŭ u kłas i byŭ zabity strełam z arbaleta.
Ułady nie raskryvajuć padrabiaznaściaŭ incydentu, adnak hazieta El Mundo paviedamlaje ab tym, što zabity nastaŭnik sprabavaŭ abaranić inšych ad padletka.
Padazravanamu, pa niekatorych dadzienych, 13 hadoŭ. Jon byŭ aryštavany, ale matyvy napadu da hetaha času nieviadomyja.
Adna z vučanic škoły, Pauła Amajełas, raspaviała žurnalistam, što viedaje padazravanaha, jaki, pa jaje słovach, byŭ adzinočkaj, ale jakich-niebudź prablem u škole ŭ jaho nie było.
«Školniki časam žartavali nad im, i, mahčyma, takim čynam jon vyrašyŭ za siabie pastajać, — skazała Pauła. — Jon byccam zvarjacieŭ. Šmat havaryŭ pra zbroju ŭ papiarednija dni. U jaho byŭ śpis tych, kaho jon chacieŭ zabić. I potym jon zrabiŭ heta».
Kali paćvierdzicca, što napadniku 13 hadoŭ, jamu nie buduć pradjaŭlenyja abvinavačvańni. Uzrost kryminalnaj adkaznaści ŭ Ispanii — 14 hadoŭ. Jak paviedamiŭ supracoŭnik ministerstva justycyi Ispanii, u hetym uzroście padletak moža być adpraŭleny tolki na prymusovaje lačeńnie ŭ psichijatryčnuju kliniku, kali vyśvietlicca, što jon pakutuje na psichičnaje zachvorvańnie.
