Ministerstva pracy i sacyjalnaj abarony nie płanuje ŭ chutkim časie inicyjavać papraŭki ŭ dekret prezidenta № 3 ab papiaredžańni sacyjalnaha ŭtrymanstva. Pra heta paviedamiŭ namieśnik ministra pracy i sacyjalnaj abarony Valeryj Kavalkoŭ na sustrečy z aktyvistkaj kampanii «Havary praŭdu» Taćcianaj Karatkievič 22 krasavika ŭ Minsku.
«Ja padała jamu tekst pietycyi ab tym, što dekret treba admianić, padpisanuju ŭžo 30 tysiačami čałaviek. My doŭha havaryli ab nastupstvach, da jakich pryviadzie realizacyja pałažeńniaŭ dekreta. Hałoŭny jaho plus, jaki bačyć Kavalkoŭ, što dekret uskałychnuŭ śviadomaść hramadzian, prymusiŭ ich zadumacca», — paviedamiła Karatkievič.
Pavodle jaje słoŭ, Kavalkoŭ skazaŭ, što ŭ chutkim časie ŭ dekret nie płanujecca ŭnosić papraŭki. «Jon miarkuje, što było zroblena ŭsio mahčymaje, kab uličyć usie žyćciovyja situacyi. Ciapierie jany chočuć, kab dakumient papracavaŭ. Namieśnik ministra taksama aktyŭna adstojvaŭ pazicyju, što dakumient nie parušaje Kanstytucyju, što jon vielmi patrebny», — zaznačyła Karatkievič.
Na sustrečy z čynoŭnikam Karatkievič taksama prapanavała ŭnieści ŭ zakanadaŭstva ab vieteranach takuju katehoryju hramadzian, jak «dzieci vajny», a taksama vyznačyć im pieralik ilhotaŭ, naprykład, na prajezd u transparcie, na miedycynskaje absłuhoŭvańnie, ci niejkija finansavyja dapłaty i vypłaty. «Kavalkoŭ skazaŭ, što heta tema nie raz uźnimałasia na ŭzroŭni ministerstva, ale zruchi nie adbyvajucca, tamu što mohuć być pakryŭdžanyja inšyja katehoryi pažyłych ludziej, a mahčymuju niezadavolenaść siarod ich jany vyklikać nie chacieli b. Druhoje — heta finansavyja vydatki, na jakija ciapier niama srodkaŭ», — skazała Karatkievič.
Nahadajem, Alaksandr Łukašenka 18 krasavika padčas respublikanskaha subotnika paabiacaŭ pry nieabchodnaści vypravić da kanca hoda situacyju z dekretam ab papiaredžańni sacyjalnaha ŭtrymanstva. «Da kanca hoda my budziem manitoryć situacyju, kab nichto niezasłužana nie paciarpieŭ. Pamylilisia — papravim, ale treba, kab jon papracavaŭ», — skazaŭ jon.
