Mienharvykankam paličyŭ niametazhodnym raźmiaščeńnie hazety «Naša Niva» na terytoryi Miensku na toj padstavie, što jaje hałoŭny redaktar Andrej Dyńko byŭ aryštavany padčas paślavybarčych pratestaŭ na Kastryčnickaj płoščy. Heta aznačaje pazbaŭleńnie jurydyčnaha adrasu i adpaviedna spynieńnie vychadu hazety ŭ Biełarusi. Andrej Dyńko ličyć, što ŭ dačynieńni da «Našaj Nivy» pryniataje palityčnaje rašeńnie.
Ja zaśpieła hałoŭnaha redaktara «Našaj Nivy» Andreja Dyńka za padrychtoŭkaj zvarotu da litoŭskaha ŭradu.
(Dyńko: ) «My pryniali rašeńnie źviarnucca da ŭradu Litoŭskaj respubliki, ministerstvaŭ kultury inšych krainaŭ, mižnarodnych arhanizacyjaŭ z prośbaj, kab jany chadajničali pierad JUNESKO ab uklučeńni hazety «Naša Niva» ŭ śpis niemateryjalnaj spadčyny čałaviectva JUNESKO. Heta było b symbalična i vielmi važna ŭ hetaj sytcuacyi. My budziem abskardžvać hety list».
List za podpisam namieśnika staršyni Mienharvykankamu spadara Michaiła Ciciankova ab niametazhodnaści raźmiaščeńnia «Našaj Nivy» u stalicy byŭ atrymany ŭ adkaz na zajavu redakcyi ab pierarehistracyi. Ja źviarnułasia pa tłumačeńni da kiraŭnika idealahičnaha ŭpraŭleńnia Mienharvykankamu Hienadzia Kurbieki:
(Kurbieka: ) «Jany źviarnulisia ŭ adpaviednaści z našymi paŭnamoctvami, kab my im dali jurydyčny adras,– i harvykankam im admoviŭ. Jany nia zmohuć isnavać na zakonnych padstavach».
Admietna, što ŭ toj ža dzień Ministerstva suviazi i infarmatyzacyi dasłała ŭ «Našu Nivu» list z admovaj u vydačy licenzii na praviadzieńnie padpiski na hazetu.
Nahadaju, što ad 1 studzienia «Našaja Niva», jak i bolšaść biełaruskich niezaležnych vydańniaŭ, pazbaŭlenaja mahčymaści padpiski i raspaŭsiudu praź dziaržaŭnuju sietku.
Andrej Dyńko ličyć, što ŭłady pryniali palityčnaje rašeńnie ŭ dačynieńni da hazety «Naša Niva».
(Dyńko: ) «Jak tolki my pazbaŭlajemsia jurydyčnaha adrasu, na praciahu adnaho-troch miesiacaŭ sud prosta likviduje nas za adsutnaść jurydyčnaha adrasu. Ja nie vyklučaju, što paśla hetaha nam admović i drukarnia. Najpierš prosim ad čytačoŭ vytrymki j aptymizmu. Hazeta budzie vychodzić. Navat, kali treba budzie, «Naša Niva» vierniecca na histaryčnaje miesca svajho vydańnia ŭ Vilniu. Heta značyć, što jana budzie zarehistravanaja ŭ Litvie».
Mastacki redaktar «Našaj Nivy» Siarhiej Chareŭski ličyć, što padstavu, na jakoj hazecie admaŭlajuć u jurydyčnym adrasie, ułady mohuć vykarystać i ŭ dačynieńni da inšych arhanizacyjaŭ.
(Chareŭski: ) «Fakt administracyjnaha aryštu budzie vykarystany i ŭ dačynieńni da inšych, chto byŭ źniavoleny tymi dniami. I ŭsie, vidavočna, jany pavodle analohii z «Našaj Nivaj» atrymajuć padobnyja papiaredžańni. «Naša Niva» apynułasia pieršym precedentam u toj druhoj chvali biaźlitasnych represijaŭ, jakich ciapier varta čakać z boku ŭłady».
Juryst Biełaruskaj asacyjacyi žurnalistaŭ Andrej Bastuniec źviartaje ŭvahu na toje, što ŭ admovie ŭ raźmiaščeńni redakcyi ŭ stalicy Mienharvykankam pavinien byŭ spasyłacca na zakanadaŭčyja akty, a nie na «metazhodnaść».
(Bastuniec: ) «Uzhadnieńnie raźmiaščeńnia srodku masavaj infarmacyi stavicca ŭ zaležnaść ad taho, ci pryciahvaŭsia redaktar da administracyjnaj adkaznaści. Heta navat ciažka kamentavać ź jurydyčnaha punktu hledžańnia».
U zvarocie da čytačoŭ, raźmieščanym na internet-sajcie hazety, havorycca:
«Zamach na «Našu Nivu» – heta symbaličny pačatak treciaha terminu Alaksandra Łukašenki. «Našu Nivu» cynična začyniajuć napiaredadni jaje 100-hodździa».
Nahadajem, što hałoŭny redaktar «Našaj Nivy» Andrej Dyńko byŭ zatrymany 21 sakavika, u časie paślavybarčych pratestaŭ, kali vychodziŭ z aŭtobusa na Kastryčnickuju płošču, a paśla asudžany pa abvinavačańni ŭ łajancy na 10 sutak aryštu.
