Uzrovień radyjacyi ŭ suviazi ź lasnymi pažarami kala Čarnobylskaj AES nie ŭjaŭlaje niebiaśpieki dla žyćcia biełarusaŭ, zajaviŭ BiełaPAN pradstaŭnik Respublikanskaha centra pa hidramietearałohii, kantroli radyjeaktyŭnaha zabrudžvańnia i manitorynhu navakolnaha asiarodździa (Hidramiet) Juryj Holikaŭ.
Pavodle jaho słoŭ, u suviazi z pažarami kala ČAES z nula hadzin 29 krasavika sistema radyjacyjnaha manitorynhu pa Homielskaj vobłaści była pieraviedzienaja «ŭ pačaščany režym pracy», u adpaviednaści ź jakim zamiery mahutnaści dozy hama-vypramieńvańnia pravodziacca kožnuju hadzinu (u zvyčajnym režymie heta robicca raz na sutki).
Pavodle danych na 9.00 30 krasavika ŭ Brahinie (Homielskaja vobłaść) mahutnaść dozy hama-vypramieńvańnia składała 53 mkR/hadz (pry siaredniamiesiačnym značeńni 53 mkR/hadz), Homieli — 11 mkR/hadz (11 mkR/hadz), Minsku — 10 mkR/hadz (10 mkR/hadz). «Situacyja stabilnaja, nijakich źmianieńniaŭ radyjacyjnaha stanovišča ŭ suviazi z pažaram nie zafiksavana», — paviedamiŭ pradstaŭnik Hidramieta.
Pažar na terytoryi śpiecyjalnaha kambinata «Čarnobylskaja pušča» (Ukraina) ŭźnik 28 krasavika i, pavodle danych Dziaržaŭnaj słužby pa nadzvyčajnych situacyjach Ukrainy, achapiŭ prykładna 320 hiektaraŭ lesu. Pa stanie na 6.00 30 krasavika ŭ miežach kantralavanaha pierymietra praciahvajecca tušeńnie asobnych ačahoŭ uzharańnia lasnoha podściłu na ahulnaj płoščy prykładna 70 hiektaraŭ, raspaŭsiudžvańnie ahniu spynienaje, paviedamlajuć ukrainskija ŚMI.
Pavodle infarmacyi ministra ŭnutranych spraŭ Ukrainy Arsiena Avakava, pažar spynieny za 20 kiłamietraŭ ad Čarnobylskaj AES i za 5 kiłamietraŭ ad mohilnikaŭ adchodaŭ. Premjer-ministr Ukrainy Arsien Jacaniuk nazvaŭ pažar u čarnobylskaj zonie samym bujnym z 1992 hoda. «Pažaru takoha maštabu ŭ nas nie było», — skazaŭ jon.
Paviedamlałasia taksama, što pryčynaj pažaru ŭ «Čarnobylskaj puščy» moh stać padpał travy.
