Upaŭnavažany ŭ pytańniach supracoŭnictva hramadzianskich inicyjatyvaŭ MZS Hiermanii Hiernart Erler ad imia fiederalnaha ŭradu Hiermanii vybačyŭsia pierad svajakami paciarpiełych i acalełych paśla złačynstvaŭ nacysckaha režymu na terytoryi Biełarusi.
Niamiecki čynoŭnik prynios hetyja publičnyja prabačeńni 4 traŭnia ŭ Minsku ŭ prysutnaści kala 200 udzielnikaŭ miemaryjalnaj pajezdki «Pamiać dziela jeŭrapiejskaj budučyni» z Aŭstryi, Biełarusi, Vialikabrytanii, Hiermanii, Izraila i Čechii. Pajezdku arhanizavali Minski i Dortmundski mižnarodnyja adukacyjnyja centry, šerah jeŭrapiejskich fondaŭ, inicyjatyŭ i cerkvaŭ. Erler adznačyŭ, što jon staŭ pieršym pradstaŭnikom niamieckich uładaŭ, jaki aficyjna prabačyŭsia pierad Biełaruśsiu za dziejańni treciaha rejcha. Jon taksama skazaŭ, što Biełaruś pryniała na siabie ŭsiu moc pieršaha ŭdaru paśla ŭvarvańnia nacystaŭ u SSSR i straciła za čas vajny 2,5 miljony nasielnictva.
«Heta złačynstva, jakoje my nie majem prava zabyć i nie zabudziem, — padkreśliŭ Erler. — Jano nie maje sabie roŭnych, i hetaja ciomnaja historyja pa-raniejšamu nas niepakoić. Jak i raniej, jana kidaje cień na adnosiny pamiž mnohimi narodami Jeŭropy. Siońnia maja kraina całkam uśviedamlaje svaju histaryčnuju adkaznaść za toje, što tady zdaryłasia».
