 Leanid Koviel |
Pra heta ŭ intervju lvoŭskaj haziecie «Vysokij zamok» paviedamiŭ ahient futbalista Alaksandr Kuliševič. Pavodle jaho słoŭ, Mižnarodnaja fiederacyja futboła (FIFA) pavinna vyrašyć, hulcom jakoha kłuba źjaŭlajecca Ł.Koviel.
A.Kuliševič paćvierdziŭ, što pad kantraktam futbalista z «Karpatami» na 2008—2011 hady staić podpis samoha Ł.Koviela.
«Jon ličyć, što nie padpisvaŭ kantrakta z «FK «Karpaty», što hety błank jamu prosta padsunuli. Jon na toj momant dumaŭ, što padpisvaŭ pahadnieńnie ab arendzie. Ja zapytaŭsia ŭ Leanida, navošta jon padpisaŭ kantrakt, jon ža nie maje prava heta rabić biez futbolnaha ahienta. Leanid byŭ šakiravany i skazaŭ mnie, što nie viedaŭ, za što raśpisaŭsia… Ale z 1 studzienia 2008 hoda hety kantrakt nabyŭ siłu», — kanstatavaŭ A.Kuliševič.
Ł.Koviel, pavodle słoŭ ahienta, «ćviorda skazaŭ», što nie vierniecca ŭ «Karpaty», navat kali daviadziecca adbyć dyskvalifikacyju (pry najaŭnaści kantraktaŭ z dvuma kłabami hulec moža być adchileny ad futboła na hod).
31 studzienia «Karpaty» nakiravali skarhu ŭ FIFA pa spravie Ł.Koviela. Siarod dakumientaŭ — zaklučeńnie Kijeŭskaha navukova‑daśledčaha instytuta sudovych ekśpiertyz ab sapraŭdnaści podpisu Ł.Koviela pad čatyrochhadovym kantraktam z «Karpatami».
Hulec minskaha «Dynama» Ł.Koviel byŭ addadzieny ŭ arendu «Karpatam» z 26 lutaha pa 31 śniežnia 2007 hoda, za što ŭkrainski bok zapłaciŭ 70 tys. dołaraŭ. 21 listapada «Karpaty» pieraličyli ŭ Minsk jašče 430 tys. dołaraŭ, kab vykupić tranśfier futbalista. Kiraŭnictva lvoŭskaha kłuba zajaviła, što ŭ pieryjad arendy Ł.Koviel padpisaŭ čatyrochhadovy kantrakt, jaki ŭstupiŭ u siłu 1 studzienia hetaha hoda. «Dynama» zasumniavałasia ŭ sapraŭdnaści dakumienta i zajaviła, što «Karpaty» vykupili tolki pałovu tranśfiernych pravoŭ.
Ciapier hulec znachodzicca ŭ «Saturnie», ź jakim zaklučyŭ piacihadovaje pahadnieńnie. U svaju čahu «Karpaty» vystavili hulca na tranśfier i prosiać nie mienš jak 3 młn. dołaraŭ.
12 studzienia «Dynama» viarnuła lvoŭskaj kamandzie 430 tys. dołaraŭ, adnak hienieralny dyrektar «Karpat» Alaksandr Jafremaŭ zajaviŭ, što bank nie pryniaŭ płaciož, pakolki «minski kłub nie zdoleŭ naležnym čynam sfarmulavać svajo płaciožnaje daručeńnie».
