Ab niepaźbiežnaści vajny pačali kazać u 1938 hodzie, chacia tady nie ŭsie ŭ heta vieryli. Zachodnija palityki da apošniaha išli na sastupki Hiermanii, bajučysia jaje sajuzu z SSSR.
12—13 sakavika 1938 hoda adbyŭsia Anšlus — uklučeńnie Aŭstryi ŭ skład Hiermanii. Pa aficyjnych niamieckich źviestkach, u Aŭstryi dałučeńnie da Hiermanii ŭchvaliła 99,75% žycharoŭ.
1938 hod. Trochu praviej ad centra Aŭhust Łandmeser — adziny, chto nie ŭskinuŭ ruku ŭ vitańni Hitleru padčas vizitu apošniaha na vierf. Jon pravioŭ 2,5 hoda na katarzie za toje, što byŭ žanaty ź jaŭrejkaj, zahinuŭ u 1941 u składzie bataljona ŭmoŭna-daterminovaha zvalnieńnia.
1 vieraśnia 1939 hoda Hiermanija ŭvodzić vojski ŭ Polšču, pačynajecca Druhaja suśvietnaja vajna. Zhodna z paktam Mołatava-Rybientropa SSSR dzielić z Hitleram Uschodniuju Jeŭropu.
1 vieraśnia 1939. Niemcy łamajuć miažu miž Polščaj i Volnym horadam Dancyham.
22 vieraśnia 1939. Moryc fon Viktoryn, Hiejnc Huderyjan i Siamion Kryvašein prymajuć supolny parad Čyrvonaj armii i Viermachta ŭ Breście.
1939. Finskija łyžniki na pazicyi padčas saviecka-finskaj vajny. Pa vynikach vajny SSSR advajavała tolki 40 tysiač km² finskaj terytoryi, Finlandyja prajaviła hieraizm i pieršaj u Jeŭropie strymała ahresara.
Červień 1940. Kapitulacyja Francyi, jakaja nie vystajała suprać Hiermanii i dvuch miesiacaŭ.
24 kastryčnika 1940. Brytanski miechanik rychtuje bombu dla apieracyi suprać italjancaŭ, sajuźnikaŭ Hitlera, u Afrycy.
Niahledziačy na pakt ab nienapadzieńni, 22 červienia 1941 hoda Hiermanija napała na SSSR.
22 červienia 1941. Maskvičy słuchajuć abviestku pra vierałomny napad nacystaŭ na Saviecki Sajuz.
28 červienia 1941. Niamieckim vojskam chapiła siami dzion, kab zachapić Minsk.
Lipień 1941. Niamieckija sałdaty ŭ Bresckaj krepaści, što trymała abaronu ŭ hłybokim tyle nacystaŭ da 30 červienia. Apošnija streły ŭ krepaści čulisia da kanca lipienia.
1 śniežnia 1941. Zienitka na dachu hatela «Maskva». Niemcy tak i nie ŭziali stalicu SSSR, što zaŭvažna ŭmacavała bajavy duch Savieckaj armii.
12 lipienia 1942. Fatohraf Maks Alpiert źniaŭ palitruka Alaksieja Jaromienku padčas bajoŭ u Varašyłaŭskaj (ciapier Łuhanskaj) vobłaści Ukrainy.
1942. Apošni jaŭrej Vińnicy. Vińnica była zaniataja niemcami 19 lipienia 1941 hoda. Da 22 vieraśnia było źniščana bolš za 28 tysiač viaźniaŭ vińnickaha hieta. Apošnija byli rasstralanyja ŭ 1942 hodzie. Na fota: kat stralaje, mužčyna viedaje, što heta śmierć, dziasiatki niemcaŭ nazirajuć.
1943 hod staŭ pierałomnym u chodzie vajny na Uschodnim froncie. Savieckija vojski pierajšli ŭ nastup.
1943, pa zaviaršeńni Stalinhradskaj bitvy. Dom Paŭłava, u jakim savieckija vojski trymali abaronu 58 dzion. U Stalinhradskaj bitvie abodva baki stracili bolš za miljon sałdat, jana jość najvialikšaj na siońnia suchaputnaj bitvaj u historyi Ziamli.
Maj 1943. Aryšt jaŭrejaŭ Varšaŭskaha hieta padčas ich adčajnaha paŭstańnia. U vyniku taho paŭstańnia zahinuli kala 7 tysiač čałaviek, 5—6 tysiač zhareli zažyva, 56 tysiač čałaviek byli razasłanyja pa łahierach śmierci. Fota sa spravazdačy Juohiena Štropa Hienrychu Himleru.
1943. Niamiecki sałdat hinie na poli boju, Ukraina.
Leta 1943, nastup na Kurskaj duzie — najvialikšaja tankavaja bitva ŭ vajnie. Pa pieramozie ŭ bitvie Čyrvonaja armija kančatkova zachapiła inicyjatyvu ŭ vajnie.
1943. Minsk, płošča Svabody, hitleraŭcy sahnali biełarusaŭ na «mitynh» u svaju padtrymku.
1943. Partyzanskaja bryhada padtrymlivaje savieckija vojski ŭ bitvie za Leninhrad.
Vierasień 1943. Biełaruskija partyzany. Jany źniščyli kala 45 tysiač niamieckich vajskoŭcaŭ i 55 tysiač biełaruskich kałabarantaŭ i ich blizkich.
24 kastryčnika 1943. Japoncy zabivajuć aŭstralijca Leapolda Siflita ŭ Novaj Hviniei. U čas Novahviniejskaj kampanii ZŠA i Aŭstralija stracili pa 7 tysiač čałaviek kožnaja, Japonija — bolš za 200 tysiač.
Studzień 1944. Žychary Leninhrada radujucca źniaćciu błakady, što tryvała 872 dni i zabrała žyćci socień tysiač ludziej. I Hiermanija, i Saviecki Sajuz viali tatalnuju, biaźlitasnuju vajnu. Nie było i havorki, kab nacysty dazvolili pravoz praduktaŭ dla žycharoŭ atočanaha horada. U vyniku ŭ pieršuju zimu błakady dzionny racyjon leninhradskich dziaciej składaŭ 125 hramaŭ chleba na dzień…
Sakavik 1944. Dzicio pobač z zabitaj matulaj u nacysckim kancłahiery «Azaryčy», Biełaruś. Fota: Ja. Padšyvałaŭ.
Letam 1944 hoda raspačalisia aktyŭnyja bajavyja dziejańni na druhim, Zachodnim froncie. ZŠA, čyje sałdaty raniej vajavali tolki ŭ Cichim akijanie i na bierahach Mižziemnaha mora, vysłalisia supolna z brytancami i kanadcami ŭ Narmandyi.
6 červienia 1944. Vysadka amierykanskich, brytanskich i kanadskich vojsk na plaž Amacha, Francyja. Praz pamyłku vyviedki sajuźniki stracili ŭ dva razy bolš sałdat za Hiermaniju, ale ŭsio ž zavajavali važny płacdarm dla adkryćcia druhoha frontu. Paśla hetaha los vajny byŭ vyrašany.
Pamiž 1941-1944. Ukrainskija partyzanki-snajpiery z atradu Kaŭpaka.
Pamiž 1944 i 1945. Sotnik Ukrainskaj Paŭstanckaj Armii Mirasłaŭ Simič (źleva) ź nieviadomymi paŭstancami. UPA vajavała suprać savieckich partyzan, polskaj Armii Krajovaj i niamieckich akupantaŭ za niezaležnaść Ukrainy. Jana praciahvała maštabnuju antysavieckuju baraćbu da 1952 hoda.
Kaniec studzienia 1945 hoda. Vojski I Ukrainskaha frontu zvalniajuć viaźniaŭ Aśviencima. Pad nadpisam «Arbeit macht frei» nacysty źniščyli tut kala 1,5 młn čałaviek.
15 lutaha 1945. Vynik tatalnaha bambavańnia Drezdena, ad jakoha zahinuli nie mienš za 18 tysiač niemcaŭ. Sprečki ab nieabchodnaści maštabnaha bambavańnia amierykancami hetaha transpartnaha i pramysłovaha centru viaducca dahetul. Nacysckaja prapahanda skarystałasia bambardziroŭkaj u prapahandysckich metach, zavysiŭšy kolkaść achviar da 200 tysiač, kab mabilizavać nasielnictva na apošni, bieznadziejny supraciŭ.
23 lutaha 1945. Fatohraf Džo Raziental źniaŭ padniaćcie ściaha ZŠA na viaršyni Surybaci padčas Bitvy za Ivadzimu ŭ vajnie ź Japonijaj.
Sakavik 1945. Afraamierykancy źbirajuć «vielikodnyja jajki dla Hitlera» pierad bitvaj pad Remahienam.
Sakavik 1945. 15-hadovy Hans-Hieorh Chienkie, niamiecki zienitčyk, uziaty ŭ pałon amierykancami. Hitler pahnaŭ na front Hitleriuhiend…
Krasavik 1945. Cieły viaźniaŭ Buchienvalda — nacysckaha kancłahiera, u jakim zahinuła jak minimum 56 tysiač čałaviek.
1 maja 1945. Savieckija sałdaty ŭzdymajuć ściah nad Rejchstaham.
Hiermanija padpisała kapitulacyju 8 maja 1945 hoda. Navina ab pieramozie dajšła da SSSR na nastupny dzień, jaki ciapier adznačajecca jak Dzień Pieramohi. Ale Druhaja suśvietnaja vajna nie skončyłasia kapitulacyjaj Hiermanii.
9 žniŭnia 1945. Hryb atamnaj bomby nad Nahasaki, Japonija. U pramysłovym centry Nahasaki ad samoha vybuchu i jaho nastupstvaŭ zahinuła da 140 tysiač čałaviek. Paśla bambardavańnia i abviaščeńnia SSSR vajny Japonii, japonski ŭrad zdaŭsia. Farmalnaja kapitulacyja padpisanaja 2 vieraśnia. Historyki dahetul spračajucca, ci apraŭdanyja byli atamnyja bambavańni. Adny ličać, što demanstracyja atamnaj zbroi strymała Stalina ad praciahu vajny — ciapier užo dla zavajavańnia Zachodniaj Jeŭropy. Druhija ličać źniščeńnie Chirasimy i Nahasaki niedaravalnym złačynstvam prezidenta Trumena.
15 žniŭnia 1945. Druhaja suśvietnaja vajna skončyłasia. Marak całuje dziaŭčynu na Tajms-Skvier, Ńju-Jork, ZŠA.
Niachaj jana nikoli nie paŭtorycca!
Hladzicie taksama:
Bierlin paśla Druhoj suśvietnaj. Kalarovaja zdymka
Ad Redakcyi: u čym falsifikacyja historyi pry śviatkavańni Pieramohi
