Studentaŭ, jakija spaźnilisia da zakryćcia internata pa pavažnaj pryčynie, vachciory ciapier abaviazanyja prapuskać ŭnutr «bieź fiksacyi faktu poźniaha viartańnia», a značyć, i nastupnych sankcyj. List z adpaviednym patrabavańniem Ministerstva adukacyi razasłała kiraŭnikam VNU respubliki.
Što takoje pavažnaja pryčyna, u liście nie tłumačycca
U lutym 2015 hoda biełaruskija studenty vystupili ź inicyjatyvaj admianić «kamiendanckuju hadzinu ŭ internatach», jak letaś heta zrabili studenty VNU ŭ Rasii. Pavodle praviłaŭ unutranaha rasparadku bolšaść internataŭ u respublicy začyniajucca ŭ 24.00 i adčyniajucca ŭ 6.00 ranicy. Mnohija studenty skardzilisia na toje, što nočču vachciory ich ci nie puskajuć naohuł, abo pakidajuć zapis ab poźnim viartańni ŭ žurnale, što ŭ dalejšym pahražaje «adpracoŭkami» na karyść internata.
Ministerstva adukacyi adreahavała na prośby studentaŭ listom za podpisam namieśnika ministra Viktara Jakžyka, jaki byŭ razasłany ŭsim VNU krainy. U dakumiencie havorycca, što studentaŭ, jakija viartajucca ŭ internat paśla 24.00 pa pavažnaj pryčynie, vachciory pavinny svabodna prapuskać unutr bieź jakich-niebudź zapisaŭ u žurnale. Kab skarystacca hetym pravam, studentu treba albo zahadzia paviedamić dziažurnamu ab spaźnieńni (daviedka z pracy, zajava na imia zahadčycy), albo vusna rastłumačyć pryčynu svajho spaźnieńnia.
Što kankretna ličycca «pavažnaj pryčynaj», nie tłumačycca. Niahledziačy na heta, aktyvisty studenckaj inicyjatyvy «Internaty 24/7» ličać adkaz Minadukacyi vialikim dasiahnieńniem.
«Heta naša sumiesnaja pieramoha, i jana pakazvaje, jak navat samyja składanyja prablemy mohuć vyrašacca razam! Uličycie, što hety list u roznych VNU moža vykonvacca ŭ roznyja terminy! Kab źmieny ŭstupili ŭ siłu, nieabchodny zahad rektara VNU. Tamu pišycie svajmu kiraŭniku prafkama i vyśviatlajcie pra situacyju ŭ svajoj VNU «, — napisali aktyvisty na staroncy supołki ŭ sacyjalnych sietkach.
Aktyvisty prasočać za tym, jak VNU vykonvajuć rekamiendacyi Minadukacyi
U bližejšy čas aktyvisty majuć namier prasačyć za tym, jak VNU buduć vykonvać novyja rekamiendacyi Ministerstva adukacyi. Jany apytajuć studentaŭ, jakija pražyvajuć u internatach, a taksama nakirujuć aficyjnyja zapyty ŭ administracyi VNU. Vyniki manitorynhu addaduć na razhlad u Ministerstva adukacyi.
Tym časam u supołku «Internaty 24/7» studenty pačali dasyłać pieršyja listy pra pośpiechi kampanii. Svaju historyju raspaviała studentka BDEU.
«My z chłopcam zasiadzielisia ŭ kaviarni, u vyniku pryjšła a pałovie pieršaj, padychodžu, tuzaju za ručku dźviarej — adkryta. Prachodžu, kažu «dobraj nočy» vachciorcy i načnoj, jany kivajuć i advaročvajucca, ja idu ŭ svoj pakoj. Jany navat ničoha nie zapiarečyli, nie paprasili vusna rastłumačyć pryčynu zatrymki — naohuł nul uvahi. Jany mianie, u pryncypie, viedajuć u tvar, dniom biez propusku chadžu… Ale kali miesiaca 1,5 nazad spaźniałasia, spytali, u čym sprava».
Studenty chočuć svabodna viartacca ŭ internaty biezadnosna «pavažnych pryčyn»
Pradstaŭniki inicyjatyvy adznačyli, što praciahnuć dziejničać, pakul u internatach nie budzie harantavany kruhłasutačny i bieśpieraškodny dostup biez pakarańniaŭ abo adpracovak za spaźnieńnie. Pryncypova važna, nastojvajuć aktyvisty, kab studentaŭ svabodna prapuskali niezaležna ad taho, jość u ich pavažnaja pryčyna ci nie.
«My vielmi spadziajemsia, što z ustupleńniem Biełarusi ŭ Bałonski praces da prablem studentaŭ i administracyi VNU, i Ministerstva adukacyi buduć prysłuchoŭvacca jašče bolš i ŭsprymać nas jak paŭnapraŭnych partnioraŭ. A ŭsim studentam my chočam pažadać być bolš aktyŭnymi i dziejničać! Budźcie kanstruktyŭnymi, i vas abaviazkova pačujuć!»
Raniej aŭtary studenckaj inicyjatyvy praz sacyjalnyja sietki źviartalisia z nabalełym pytańniem da ministra adukacyi Michaiła Žuraŭkova. Na adnoj z sustreč sa studentami kiraŭnik viedamstva zajaviŭ, što prablema kamiendanckaj hadziny nadumanaja. Žuraŭkoŭ padkreśliŭ, što administracyja VNU niasie adkaznaść za studentaŭ padčas ich vučoby — mienavita tamu dziejničaje strohi paradak.
Niezaležny ekśpiert, siabra Hramadskaha Bałonskaha kamiteta Uładzimir Dunajeŭ nazvaŭ kamiendanckuju hadzinu ŭ internatach «častkaj represiŭnaha miechanizmu, jaki parušaje akademičnuju svabodu». Na jaho dumku, u biełaruskich internatach vielmi šmat rečaŭ, jakija znachodziacca ŭ supiarečnaści z tradycyjnymi univiersiteckimi normami.
