Najbližejšym časam anłajn-tranślacyj pryhavoraŭ sudoŭ u Biełarusi naŭrad ci varta čakać. Heta vynikaje z zajaŭ pieršaha namieśnika staršyni Viarchoŭnaha suda Valeryja Kalinkoviča žurnalistam 28 maja na mižnarodnaj navukova-praktyčnaj kanfierencyi «Infarmacyjnyja technałohii i prava», jakaja prachodzić u Minsku ŭ Nacyjanalnaj biblijatecy.
«Zaŭtra anłajn-abviaščeńnia pryhavoraŭ nie budzie, ci budzie jano paślazaŭtra, nie viedaju, hetaje pytańnie prapracoŭvajecca», — skazaŭ Kalinkovič.
«U nas u adpaviednaści z pracesualnym zakanadaŭstvam videazapis sudovych pracesaŭ, uklučajučy videazapis na ličbavyja nośbity, ažyćciaŭlajecca z dazvołu staršyni i pry poŭnaj zhodzie bakoŭ. Tamu ŭ płanie videafiksacyi pracesu jaho ŭdzielnikami abo hledačami isnujuć peŭnyja pracesualnyja abmiežavańni, jakija my pavinny budziem vykonvać i ŭ dalejšym», — rastłumačyŭ pieršy namieśnik staršyni VS.
Što ž datyčycca internet-tranślacyi sudovaha pracesu jak takoha, to, pavodle słoŭ Kalinkoviča, tut taksama treba ŭličvać, što pracesualnaje zakanadaŭstva ŭtrymlivaje šerah abmiežavańniaŭ, jakija nie dazvalajuć heta rabić. «Adno z takich abmiežavańniaŭ — va ŭsich pracesualnych kodeksach u nas zapisana, što dapytanyja śviedki pa spravie nie pavinny mieć znosiny ź niedapytanymi. Jak tolki my pačynajem vieści pramuju tranślacyju z zały sudovaha pasiadžeńnia, vykanać heta patrabavańnie praktyčna niemahčyma. Luby niedapytany śviedka, jaki ŭvajšoŭ u internet, moža ŭ režymie realnaha času ŭbačyć i pačuć, jak siabie pavodzić i jakija pakazańni daje papiaredni śviedka», — rastłumačyŭ Kalinkovič.
Tamu, pavodle jaho słoŭ, u adkrytaści sudovych pracesaŭ jość svaje miežy, jakija abumoŭlenyja intaresami najpierš pravasudździa.
Kažučy pra mahčymaść abviaščeńnia rezalutyŭnaj častki pryhavoru ŭ adkrytym sudovym pasiadžeńni, Kalinkovič źviarnuŭ uvahu na toje, što, «hledziačy ŭ naš internet, siońnia heta ŭžo robicca biez asablivych namahańniaŭ z boku sudoŭ».
Pry hetym jon zajaviŭ, što ŭ sudoŭ niama siońnia zadačy abviaščać prysud u anłajn-režymie.
