Žanr: kamiedyja, bajavik
Režysior: Poł Fih
U rolach: Mielisa Makkarci, Džejsan Stetchem, Džud Łoŭ, Roŭz Birn, Miranda Chart, Bobi Kanavale, Marena Bakaryn, Raad Ravi
ZŠA, 120 chv.
Adznaka: 7
Sjuzan Kupier ŭsio svajo žyćcio maryła stać sakretnym ahientam i navat ŭładkavałasia pracavać u CRU. Adnak vyšej ofisnaha supracoŭnika — ahienta padrymki — joj tak i nie ŭdałosia prasunucca. Adnojčy najlepšy ahient Bredli Fajn pravalvaje zadańnie, padčas jakoha jon pavinien byŭ vyśviatlić miescaznachodžańnie jadziernaj bomby, i hinie. Ciapier adziny čałaviek, jaki vałodaje hetaj infarmacyjaj, — Rejna Bajanava, dačka vienhierskaha binesmiena, ale jana viedaje ŭ tvar ŭsich najlepšych ahientaŭ. Kiraŭnictvu CRU vymušanaje skarystacca pasłuhami Sjuzan Kupier, jakaja da taho ž choča adpomścić za śmierć Fajna.
Amierykanski režysior i stend-ap komik Poł Fih źniaŭ čarhovuju jaskravuju kamiedyju, hetym razam pakpiŭšy z žanru špijonskaha bajevika.
Mielisa Makkarci, viadomaja pa sieryjale «Majk i Moli», a taksama stałaja ŭdzielnica prajektaŭ Fiha («Dziavočnik u Viehasie» (2011)), syhrała hałoŭnuju hierainiu Sjuzan. Rola vytančanaha špijona dastałasia brytancu Džudu Łou, a Džejsan Stetchem adyjšoŭ ad ampłua biezemacyjnaha zabojcy i vykanaŭ rolu niazhrabnaha špijona-bałaboła Forda. Režysior Poł Fih źniaŭsia ŭ epizadyčnaj roli.
Razam z hierojami hladač naviedaje Rym i Paryž, adnak bolšaja častka filma była źniataja na zdymačnych placoŭkach Budapiešta i ŭ vakolicach voziera Bałaton u Vienhryi. Mielisa Makkarci demanstruje niezvyčajnaje vałodańnie adzinaborstvami - dla pastanovak vykarystoŭvaŭsia filipinski styl. Niekalki tydniaŭ repietycyj spatrebiłasia, kab źniać vidoviščnuju scenu bojki na kuchni, a sami zdymki zaniali dva dni.
Adna z samych zachaplalnych scen była źniataja ŭ samalocie, kali ad praboin u korpusie ŭźnik efiekt biazvažkaści.
Dla hetaha samalot byŭ zamacavany na śpiecyjalnym padviesie, jaki dazvalaŭ nachilać i pavaročvać jaho ŭ lubym kirunku. Usie ruchi samalota kantralavalisia pry dapamozie hidraŭličnaha kiravańnia, a akciory i kaskadziory byli pryviazanyja śpiecyjalnymi trosami dla stvareńnia takoha adčuvańnia, byccam jany płyvuć.
U jakaści zaprošanych zorak u filmie źjavilisia Vierka Siarziučka (Andrej Daniłka) i amierykanski repier 50 Cent.
Stužka vyznačajecca niadrennym, choć časam niedalikatnym amierykanskim humaram. Hieroi pastajanna kpiać adzin z adnaho, navat traplajučy ŭ samyja nievierahodnyja situacyi. Jak parodyja film atrymaŭsia śmiešnym, ale prysutničajuć žorstkija naturalistyčnia momanty, što padymaje rejtynh da 18+.
Nastaśsia Ułasava
