Słupki termomietraŭ u Biełarusi ŭ niadzielu ŭźnimucca da 34 hradusaŭ. Ab hetym paviedamiŭ siońnia na bryfinhu «Nadvorje na leta» načalnik słužby hidramietearałahičnych prahnozaŭ Respublikanskaha centra pa hidramietearałohii, kantroli radyjeaktyŭnaha zabrudžvańnia i manitorynhu navakolnaha asiarodździa Dźmitryj Rabaŭ.
«Ciapier u Biełarusi ŭstalavałasia kamfortnaje nadvorje, dźmie paŭnočny viecier, ale z čaćviarha da nas pačnie pastupać paŭdniovaje pavietra, tempieratura budzie pavyšacca. Samaje piekła čakajecca ŭ vychadnyja dni — dniom u subotu pavietra prahrejecca da 25-32 hradusaŭ, u niadzielu słupki termomietraŭ uźnimucca da 27-34 hradusaŭ», - skazaŭ Dźmitryj Rabaŭ.
Jon adznačyŭ, što pry takoj tempieratury znachodzicca ŭ miežach horada vielmi składana, heta mocna ŭpłyvaje na mieteazaležnych ludziej: pažyłych, maleńkich dziaciej, tamu im treba vielmi ŭvažliva stavicca da svajho zdaroŭja i pastaracca nie vychodzić z doma, asabliva apoŭdni.
Pavodle słoŭ Dźmitryja Rabava, z paniadziełka praz paŭnočna-zachodnija rehijony Biełarusi buduć prachodzić cykłon i aktyŭnyja atmaśfiernyja franty, tamu na bolšaj častcy terytoryi čakajucca daždžy.
U paniadziełak miescami heta buduć mocnyja daždžy i navalnicy, pry navalnicach škvalistaje ŭzmacnieńnie vietru da 15-20 m/s. U asobnych rajonach mahčymy hrad.
U aŭtorak na bolšaj častcy terytoryi taksama prahnazujucca daždžy i navalnicy. U paniadziełak tempieratura pavietra pa paŭnočnym zachadzie składzie 21-26 hradusaŭ, a na bolšaj častcy terytoryi - 27-34 hradusy. U aŭtorak haračynia krychu spadzie, dniom budzie 16-22, pa paŭdniovym uschodzie zachavajecca - 23-28 hradusaŭ
