Andrej Sakałoŭski vyklikaŭ milicyju na pjanaha.
U Redakcyju źviarnuŭsia Andrej Sakałoŭski ź vioski Dzieraŭnaja Słonimskaha rajona. Jon śćviardžaje, što jaho źbiŭ major.
«U subotu dniom, 6 červienia, moj susied, jaki lubić vypić, vyjšaŭ u harod i pačaŭ maciukacca, u tym liku na moj adras. Ad susieda patychała ałkaholem, jon chistaŭsia. Dzieści praz hadzinu mnie heta nadakučyła i ja vyklikaŭ milicyju. Pryjechali jany praz hadzinu. Susieda pasadzili ŭ mašynu i pavieźli. Jak skazali, na abśledavańnie ŭ słonimskuju balnicu. A ja baču, što jany pajechali nie ŭ bok horada. Sieŭ tady na svajo aŭto i pajechaŭ za imi. Znajšoŭ ich na kałhasnych majsterniach: jany chadzili pa vulicy. Kali ŭbačyli mianie, sieli ŭ mašynu. Mnie nie adkazvali, što jany tam robiać. I pajechali ŭ bok horada. Ja pajechaŭ za imi. Spynilisia na darozie i chvilin dziesiać prosta stajali».
Andrej paličyŭ, što jany naŭmysna zaciahvali čas, kab adterminavać momant ekśpiertyzy, i tamu pajechaŭ za imi.
«Na ŭjeździe ŭ horad na zapraŭcy jany stali ŭ čarhu. Ja dastaŭ fotaaparat i pačaŭ zdymać. Spytaŭsia, što jany robiać. Tady z mašyny vyjšaŭ major, schapiŭ mianie za ruku. Ja nie čakaŭ, što jon pačnie na mianie napadać. Vyskačyŭ i kiroŭca i pačaŭ mnie zakručvać ruki. Ja spałochaŭsia i pačaŭ klikać na dapamohu. Padyšli mužčyny. Tady milicyjanty mianie adpuścili i źjechali».
Častku epizoda jon źniaŭ na videa.
Andrej kaža, što paśla zdareńnia patelefanavaŭ na 102. Jamu prapanavali padjechać u adździaleńnie. Ale admoviŭsia — pabajaŭsia. Kaža, što źniaŭ paboi (siniaki zastalisia na ruce) i napisaŭ zajavu ŭ Śledčy kamitet.
— Nie zusim jaho [Sakałoŭskaha] učynki adpaviadajuć zakanadaŭstvu. Šmat u jaho pravoŭ, ale abaviazkaŭ svaich nie bačyć. Ja mahu skazać, kali milicyja vyjechała, jana adreahavała. Kali byŭ zrobleny zvarot, to my daviali da kanca, — zajaviŭ načalnik Słonimskaha RAUS Alaksandr Truchan. — Materyjały ŭsie ŭ nas zarehistravany — pravodzim pravierku. Jon try zajavy napisaŭ. Hramadzianin miedycynski ahlad prajšoŭ. I kaža, što jaho źbiŭ [Sakałoŭski], my dali nakiravańnie na cialesnyja paškodžańni. Čahości zvyšnaturalnaha, jak padnosicca, tut niama. Jon sam pa sabie kanfliktny čałaviek. I šmat jaho zajaŭ razhladajem, — kaža Truchan. — U maim razumieńni, jon sam šukaje kanfliktu. U nas jašče jość materyjały pravierki nakont taho, što jon raniej zajaŭlaŭ. Pravierki pravodziacca. Hety hramadzianin nie choča ŭstanavić iścinu, a choča kanfliktu, — miarkuje načalnik milicyi.
Takim čynam, raźbiracca ŭ situacyi budzie Śledčy kamitet.
Darečy, u kastryčniku 2014 u internet trapiła videa, na jakim inśpiektar DAI ŭ formie, ale nie na słužbovaj mašynie, u Połacku spyniŭ aŭto na minskich numarach i abmaciukaŭ kiroŭcu. Historyja skončyłasia tym, što supracoŭnik Rasonskaha RAUSa, jaki trapiŭ u skandalnaje videa, napisaŭ rapart na zvalnieńnie.
