Vyjava: eso.org
Astranomy z dapamohaj Vielmi vialikaha teleskopu (VLT) znajšli samuju jaskravuju ź viadomych hałaktyku CR7, zorki jakoj naležać da III typu zornaha nasielnictva — pieršaha pakaleńnia zorak paśla Vialikaha vybuchu, paviedamlajecca na sajcie Paŭdniovaj Jeŭrapiejskaj absiervatoryi.
U pošukach samych starych zorak, što mieli b utvarycca praz 800 młn hod paśla Vialikaha vybuchu, astranomy zładzili samy maštabny ahlad vielmi dalokich hałaktyk. Atrymałasia znajści šerah niečakana jaskravych i vielmi maładych hałaktyk.
Dahetul byli viadomyja tolki dva typy nasielnictva zorak: pieršy, da jakoha adnosiacca Sonca i bolšaść viadomych zorak, što ŭ śpiektry bahata atamaŭ ciažej za hielij, i druhi, zorki jakoha majuć na paradki mienš ciažkich elemientaŭ. Zorki druhoha kłasu starejšyja za 10 młrd hod, ale jany nie samyja staryja ŭ Suśviecie.
Treci kłas byŭ pradkazany tearetyčna i musiŭ składacca ź vielmi ciažkich i vielmi vialikich zorak z małym časam žyćcia, što ŭtvarylisia ŭ chutkim časie paśla Vialikaha vybuchu. Mierkavałasia, što takija zorki nie dažyli da našych dzion.
U adkrytaj padčas daśledavańnia hałaktycy CR7, samaj jaskravaj ź viadomych na siońnia, było zaŭvažanaje mocnaje vypramieńvańnie ianizavanaha hieliju dy ani śledu bolš ciažkich elemientaŭ. Heta pakazała na najaŭnaść u joj samych maładych zorak Suśvietu.
U CR7 byli znojdzienyja błakitnyja i čyrvonyja skopiščy zorak. Miarkujecca, što zorki ŭ joj farmavalisia chvalami. Heta značyć, što znajści samyja maładyja zorki Suśvietu praściej, čym mierkavałasia raniej: jany mohuć znachodzicca ŭ jaskravych hałaktykach, nie abaviazkova samych rańnich, maleńkich i blakłych.
Mienavita ŭ takich zorkach, jak znojdzienyja ŭ CR7, utvaralisia pieršyja ŭ Suśviecie ciažkija atamy, ź jakich składajemsia ŭ tym liku i my.