 Sierž Sarkisian |
U Jerevanie abjadnanaja apazycyja sprabuje pavalić pramaskoŭski režym. Pavodle aficyjnych źviestak, na prezydenckich vybarach u Armienii pieramoh premjer‑ministar krainy Sierž Sarkisian, pierajemnik Kačarana. Apazycyja i jaje lider, pieršy prezydent krainy Lavon Ter-Pietrasian, vinavaciać ułady ŭ masavych falsyfikacyjach.
Jak pieradajuć ź Jerevanu infarmahienctvy, siońnia dziasiatki tysiačaŭ manifestantaŭ prajšlisia šeściem pa centry armianskaj stalicy. Demanstracyja była mirnaj, siły achovy paradku nie spyniali jaje. Na čale ź Lavonam Ter-Pietrasianam, byłym prezydentam krainy i najmacniejšym z kandydytaŭ apazycyi na prezydenckich vybarach, pratestoŭcy atačyli budynak Centravybarkamu. Nasupierak čutkam pra mahčymy šturm budynku, manifestanty tolki pakazali svaju šmatlikaść i pieramiaścilisia na adnu z centralnych płoščaŭ, dzie praviali mitynh.
Akcyi pratestu majuć pradoŭžycca zaŭtra. Siońnia pratestoŭcy abyšli budynki ŭradu, słužby biaśpieki i MUS. Faktyčna, stalica Armienii apynułasia pad kantrolem apazycyi.
Heta akazałasia siurpryzam nia tolki dla ŭładaŭ krainy, ale i dla śvietu. Da pačatku mitynhu pieramohu Sarkisiana paśpieli pryznać prezydenty Pucin, Sarkazi i Saakašvili. Zachad pabojvajecca destabilizacyi sytuacyi ŭ Armienii, tamu admoŭčvajecca. Ale nasielnictva krainy, stomlenaje karupcyjaj, nie zvažaje na strymanyja acenki naziralnikaŭ ad ABSE, što pryznali vybary ŭ cełym svabodnymi.
Prezydenty na Paŭdniovym Kaŭkazie jašče nikoli nie źmianialisia šlacham vybaraŭ.
Papiarednija prezydenckija vybary ŭ Armienii taksama skančalisia vuličnym procistajańniem, ale jašče nie było takim šmatludnym. Varta adznačyć, što Armienija maje pluralistyčnuju palityčnuju kulturu. Heta bolš demakratyčnaja kraina, čym sučasnaja Biełaruś. Hałoŭnaja pahroza demakratyi ŭ joj sychodzić nie ad dziaržaŭnaha represiŭnaha aparatu, a ad hrašovych miachoŭ.
Ter-Pietrasianu ŭdałosia źjadnać raznamasnuju apazycyju i ździejśnić cudoŭnaje viartańnie ŭ palityku. Jaho padtrymali 20 drobnych apazycyjnych partyjaŭ. Pieršy raz Ter-Pietrasianu ŭdałosia vyvieści na vulicy stalicy 100 tysiačaŭ svaich prychilnikaŭ napiaredadni vybaraŭ. «Ja dapuściŭ prychod da ŭłady Kačarana j Sarkisiana, ja samy mušu adchilić ich ad ułady», — zajaviŭ Ter-Pietrasian, pieršy kiraŭnik Armienii časoŭ niezaležnaści.
Darečy, Armienija siońnia śviatkavała 20-hadovy jubilej Karabachskaha ruchu. Adnak Sarkisian — vychadziec z Karabachu — nia zdoleŭ paprysutničać na jubilejnym salucie, bo Teatralnaja płošča, miesca fejerverkaŭ, była apanavanaja manifestantami.
* * *
 Lavon Ter-Pietrasian |
Pavodle aficyjnych źviestak, na prezydenckich vybarach u Armienii pieramoh premjer‑ministar krainy Sierž Sarkisian. Jon taksama ŭznačalvaje kiroŭnuju Respublikanskuju partyju.
U Centralnaj vybarčaj kamisii Armienii zajavili, što ŭ pieršym tury jon nabraŭ 52,8 adsotkaŭ hałasoŭ.
Pavodle tych ža źviestak, hałoŭny supiernik Sarkisiana, były prezydent, adzin ź lideraŭ apazycyi Lavon Ter‑Pietrasian atrymaŭ padtrymku 21 adsotka vybarščykaŭ. Adnak jahonyja prychilniki raspačali akcyju pratestu ŭ Jerevanie, kala Matenadaranu, schovišča starych armianskich rukapisaŭ
. Litaralna za 50 metraŭ ad hetaj płoščy znachodzicca Centravybarkam, atočany vajskoŭcami.
Niezaležny ekzyt-poł, arhanizavany armianskimi moładzievymi arhanizacyjami, zafiksavaŭ pieramohu Ter-Pietrasiana nad Sarkisianam: 37 suprać 35 pracentaŭ hałasoŭ. Dva inšyja ekzyt-poły addali pieravahu Sarkisianu, choć i ź niejmavienaj roźnicaj: adzin 57, a druhi 33 pracenty hałasoŭ.
