Hlize 436 b va ŭjaŭleńni mastaka. Vyjava: NASA, ESA, G. Bacon (STScI)
Vyjava: Mark Garlick / University of Warwick
Astranomy ŭniviersiteta Ženievy (Šviejcaryja) pabačyli dziakujučy źviestkam ultrafijaletavaha śpiektrohrafa kaśmičnaha teleskopa «Chabł» kamietny chvost u ekzapłaniety ŭ suzorji Lva, pra što raspaviali ŭ časopisie Nature.
Hlize 436 b padobnaja da Nieptuna, ale maje chvost rychtyk jak u kamiety. Jana hublaje da tysiačy ton vadarodu na siekundu.
Padčas prachodu za svajoj zorkaj Hlize 436 płanieta praktyčna nie hublała jaskravaści dla ziamnoha naziralnika ŭ bačnym dyjapazonie, ale va ŭltrafijaletavym stanaviłasia zaŭvažna mieniej jaskravaj za try hadziny da ŭłasna pierasiačeńnia zornaha dysku i viartała jaskravaść tolki praz try hadziny paśla pierasiačeńnia.
Vyjaviłasia, što vadarod u atmaśfiery płaniety «vybivała» vypramieńvańnie jaje zorki — ad sotni da tysiačy ton vadarodu štosiekundu vyryvajucca za miežy atmaśfiery, stvarajučy chvost jak u kamiety. Praŭda, z ulikam značnaj masy atmaśfiery straty składajuć kala 0,2% atmaśfiery na miljard hod. Uzrost Hlize 436 b aceńvajecca ŭ 6 młrd hod, na pieršym miljardzie jana mahła zhubić da 10% atmaśfiery.
Hlize 436 b — były hazavy hihant, jaki zanadta blizka padabraŭsia da svajoj zorki, čyrvonaha karlika. Adlehłaść da zorki składaje 4,35 młn km, što ŭ dziesiać raz mienš za adlehłaść ad Mierkuryja da Sonca. Masa płaniety składaje 22,2 masy Ziamli, radyus — 4,3 radyusy Ziamli. U asnoŭnym składajecca ź lodu, što ŭtvaryŭsia pry vysokaj tempieratury i vysokim cisku, maje nievialikaje kamiennaje jadro i atmaśfieru z vadarodu i hieliju. Ad Ziamli da Hlize 436 b 33 śvietłavych hoda.
