Bolšaść žycharoŭ Hrecyi vystupaje za pryniaćcie umoŭ, pastaŭlenych krainie mižnarodnymi kredytorami, paviedamlaje Błumbierh sa spasyłkaj na źviestki praviedzienaha arhanizacyjaj GPO sacyjałahičnaha apytańnia.
Na dadzieny momant za sastupki kredytoram na niadzielnym refierendumie hatovyja prahałasavać 47% apytanych. U toj ža čas za admovu vykonvać umovy ŭltymatumu vykazalisia 43% respandentaŭ. Astatnija pakul nie vyznačylisia.
Apytańnie pravodziłasia ŭ aŭtorak siarod tysiačy respandentaŭ. Pa dadzienych jaho aŭtaraŭ, chibnaść nie pieravyšaje 3,1%. Pry hetym jašče na minułym tydni kolkaść prychilnikaŭ admovy ad sastupak składała bolš za pałovu.
U niadzielu ŭ Hrecyi projdzie refierendum, na jakim hramadzianie krainy pavinny vyrašyć, ci varta Afinam skaračać dziaržaŭnyja vydatki sposabam, prapanavanym kredytorami.
U vypadku admovy hrekaŭ prymać hetyja ŭmovy krainie pahražaje defołt i vyklučeńnie ź jeŭrazony. Pry hetym premjer-ministr krainy Aleksis Cypras zaklikaŭ nasielnictva hałasavać suprać sastupak kredytoram.
Cypras pierakanany, što rašučaja admova ad pastaŭlenaha jaho krainie ŭltymatumu daść jamu mahčymaść damahčysia bolš vyhadnych umoŭ, bo zamiežnyja partniory zacikaŭleny ŭ zachavańni zony jeŭra ŭ jaje ciapierašnim vyhladzie.
Skaračeńnie vydatkaŭ Afinami źjaŭlajecca abaviazkovaj umovaj razbłakoŭki čarhovaha tranšu finansavaj dapamohi. Kredytory patrabujuć pavysić piensijny ŭzrost i skaracić sacyjalnyja vypłaty, u toj čas jak ułady Hrecyi prapanujuć vyrašyć finansavyja prablemy za košt pavyšeńnia padatkaŭ dla zamožnych hramadzian.
