U Siańnie (Viciebskaja vobłaść) adkryli pomnik Matronie Markievič. Mienavita jana ŭ pačatku XX stahodździa vyšyła nacyjanalny «rušnik», arnamient ź jakoha paśla pieravandravaŭ na dziaržaŭny ściah Biełarusi.
Matrona Markievič naradziłasia ŭ 1886 hodzie ŭ vialikaj sialanskaj siamji. Šyć, tkać, vyšyvać i viazać jana ŭ daskanałaści vyvučyłasia ź dziacinstva. U 1951 hodzie Viarchoŭny Saviet BSSR daručyŭ Akademii navuk zrabić eskiz ściaha, jaki b vyłučaŭsia na fonie ściahoŭ inšych dziaržaŭ. U pracoŭnuju hrupu tady ŭklučyli rodnaha brata Matrony Markievič Michaiła Kaciera, jaki zahadvaŭ siektaram etnahrafii i falkłoru AN BSSR.
U davajennych archivach «Biełpramsavieta» jon adšukaŭ malunak ŭzoru siastry pad nazvaj «Uzychodziačaje sonca». Na jaho asnovie mastak Michaił Husieŭ padrychtavaŭ prajekt, jaki ŭ vyniku i zaćvierdzili. Darečy, sučasny biełaruski ściah, jaki źjaviŭsia ŭ 1995, praktyčna identyčny ściahu Biełaruskaj SSR. Ź jaho tolki vydalenyja savieckija simvały — sierp, mołat i piacikancovaja zorka.
Unučka Matrony Markievič minčanka Dzina Kacier, jakaja pryjechała ŭ Sianno na adkryćcio pomnika, uspaminaje, što staŭleńnie jaje svajački da nacyjanalnaha arnamientu, raźmieščanym na biełaruskaj ściahu, u saviecki čas nie afišavałasia: «U SSSR nie pryniata było kazać ab nacyjanalnych asablivaściach, hanarycca imi. Jak vynik — biełarusy mała viedajuć ab svajoj historyi, kultury. Tolki ŭ apošnija hady maja babula stała čałaviekam viadomym. Siamja, naturalna, joju hanarycca».
Dzina Prakopaŭna pieradała ŭ Sieńnienski rajonny historyka-krajaznaŭčy muziej aryhinalnyja babuliny «vyšyvanki» — «ručnik» z ablezłym arnamientam, ažurny abrus i kalarovy pałavičok. Navukovy supracoŭnik muzieja Vasil Bandarevič, upeŭnieny, što na ich asnovie možna adkryć najcikaviejšuju ekspazicyju. Bolš za toje, na jaho dumku, ustalavany ŭ Dzień Niezaležnaści ŭ Sianno pomnik u honar Matrony Markievič, pavinien stać nie tolki miescam praviadzieńnia uračystaściaŭ u dzień dziaržaŭnaha ściaha i hierba. Jon taksama moža pieratvarycca ŭ sapraŭdnuju turystyčnuju słavutaść, jakaja nahadvaje ab stvareńni adnaho z najvažniejšych simvałaŭ našaj krainy.
