Źmicier Łupač raspavioŭ, što pradstaŭniki KDB schilali jaho da supracoŭnictva – kab jon paviedamlaŭ padrabiaznaści pra tutejšych aktyvistaŭ, pra sustrečy ź siabrami HA «BAŽ» i pra apazicyjnuju aktyŭnaść u rehijonie.
Spačatku jon vyrašyŭ prosta ihnaravać prapanovy, ale jany paŭtaralisia. Tady Źmicier vyrašyŭ źviarnucca da žurnalistaŭ i pravaabaroncaŭ.
Jen raspavioŭ, što mieŭ niekalki sustreč sa śpiecsłužbami – i minskimi, i hłybockimi.
Pieršaja adbyłasia 25 červienia ŭ finansavaj milicyi.
Žurnalista nie ździviŭ vyklik tudy, bo napiaredadni jon mieŭ prablemy z padatkovaj inśpiekcyjaj i zapłaciŭ štraf. Miž tym, jak vyśvietliłasia, vyklik byŭ źviazany nie z hetym.
Jaho sustreli miascovyja pradstaŭniki KDB i dvoje nieviadomych ludziej, jakija skazali, što pryjechali ź Minsku admysłova dziela sustrečy ź im.
«Jany nazvali siabie, pakazali «čyrvonyja knižački», ale ja ad niečakanaści ničoha nie zapomniŭ, – kaža Źmicier Łupač. – Adzin ź ich pačaŭ raspytvać mianie pra pajezdki va Ukrainu, a taksama pra maje kantakty z zamiežnikami».
Adzin z takich «kantaktaŭ» adbyŭsia ŭ červieni. Źmicier sustrakaŭsia z palakami, jakija pryjazdžali na Hłyboččynu, i paźniej na sajcie «Jeŭraradyjo» i ŭ haziecie «Volnaje Hłybokaje» vyjšaŭ artykuł «Znajšlisia svajaki pamiežnika, jaki zahinuŭ na Hłyboččynie 17 vieraśnia 1939 hoda». Apovied pra heta staŭ nahodaj dla administracyjnaha pracesu. Źmitra Łupača abvinavacili ŭ supracoŭnictvie z zamiežnymi ŚMI biez akredytacyi – parušeńni artykuła 22.9 Kodeksa ab administracyjnych pravaparušeńniach (niezakonny vyrab i raspaŭsiud pradukcyi ŚMI). Sud nad niezaležnym žurnalistam byŭ pryznačany na 10 lipienia, ale dakumienty adpravili na dapracoŭku ŭ milicyju.
30 červienia Źmitra pa telefonie vyklikaŭ na sustreču supracoŭnik miascovaha KDB.
U časie razmovy jon papiaredziŭ žunalista pra niedapuščalnaść supracoŭnictva z zamiežnymi ŚMI biez akredytacyi i dyskredytacyi Respubliki Biełaruś (art. 369-1 KK RB) –– pradastaŭleńnia zamiežnaj dziaržavie niepraŭdzivych źviestak pra palityčnaje, ekanamičnaje, sacyjalnaje stanovišča hramadzian i h.d.
«Supracoŭnik KDB skazaŭ, što ŭ ich jość šmat dokazaŭ majho supracoŭnictva z zamiežnymi ŚMI biez akredytacyi, ale jany nie buduć ich ahučvać, kali ja pahadžusia «dapamahčy». Mnie było prapanavana infarmavać «orhany»
–– jany, maŭlaŭ, zacikaŭlenyja, «kab u rehijonie ŭsio było spakojna». Pryčym supracoŭnik KDB zaznačyŭ, što ŭ vypadku admovy buduć prablemy ŭ majoj žonki i dziaciej».
Źmicier mierkavaŭ, što KDB stracić dla jaho cikavaść, kali nie davać nijakaj infarmacyi. Miž tym, 9 lipienia toj samy supracoŭnik patelefanavaŭ i znoŭ prapanavaŭ sustrecca. Źmicier Łupač kaža, što kateharyčna admoviŭsia być «stukačom», niahledziačy na pahrozy. I vyrašyŭ raspavieści svaju historyju, kab papiaredzić siabroŭ i kaleh, što jany taksama mohuć trapić u padobnuju situacyju.
