Zasnavalnik startapa Kino-Mo Kirył Čykiejuk raspavioŭ pra toje, čamu ich pradukt nie moh źjavicca ŭ Biełarusi, jak hałahrafičnaja rekłama stanie praduktam mas-markiet. i pra toje, ci jość u Kino-Mo biełaruskaja budučynia.
Vy pavinny viedać svoj košt
- Ja nie dumaju, što ŭsia talenavitaja moładź pavinna źjazdžać vučycca ŭ Oksfard abo luby inšy prestyžny VNU, ale ŭsie jany pavinny razumieć, što ŭ ich jość takaja mahčymaść. Našy vypuskniki, na žal, časta siabie niedaaceńvajuć, jany pavinny viedać sabie košt.
A naohuł, ja liču, što ŭ Biełarusi skłałasia mocnaja škoła techničnych śpiecyjalistaŭ, i našy chłopcy zdolnyja hodna kankuryravać na suśvietnym rynku, ale mnohija ź ich vybirajuć zastacca i raźvivacca ŭ Biełarusi.
Ja viedaju šmat surjoznych alimpijadnikaŭ, jakija vybrali zastacca ŭ BDU, choć mahli volna pajechać jak minimum u maskoŭski MFTI.
Kali b prafiesary ź Jeŭropy i ZŠA viedali, što ŭ nas jość takaja surjoznaja prasłojka techničnych hienijaŭ, ja dumaju, jany sami pa ich siudy pryjechali b.
Oksfard - heta miesca, dzie ty pastajanna znachodzišsia ŭ asiarodździ najlepšych
- Oksfard, dzie ja atrymaŭ PhD, - samaje lepšaje miesca ŭ śviecie ŭ płanie raznastajnaści i jakaści studenckaha žyćcia. Heta nie prosta ŭniviersitet, a ceły horad z varjackaj infrastrukturaj i asablivaj atmaśfieraj, dzie ty pastajanna znachodzišsia ŭ asiarodździ najlepšych. Kali ty pastajanna krucišsia ŭ hetaj atmaśfiery, heta natchniaje. U Oksfardzie kožny dzień vypivajecca vielmi šmat ałkaholu i heta taksama natchniaje, daje ŭnutranuju siłu.
Kino-Mo nie moh źjavicca ŭ Biełarusi
- My b nie zmahli rabić naš prajekt u Biełarusi, hetak ža sama jak u Šviejcaryi ci luboj inšaj maleńkaj jeŭrapiejskaj krainie. Pryčyna tut vyklučna kamiercyjnaja — u hetych krainach niama takoha raźvitoha rynku digital out of home (rynak vonkavaj rekłamy). U Anhlii abjom hetaha rynku vyznačajecca ličbaj 1 młrd funtaŭ, a ŭ nas jon u tysiačy razoŭ mienš.
Meta - pradukt mas-markiet
- Siońnia ŭ śviecie jość 30-40 rynkaŭ, na jakija płanujem vychodzić. I maštabavańnie našaha biźniesu my bačym praz stvareńnie partniorskaj sietki, jakaja dazvolić pabudavać sietku Kino-Mo-dysplejaŭ, jak alternatyvu biłbordam. Usie partniory buduć abjadnanyja na našaj płatformie, kudy kožny ź ich maje niezaležny ŭvachod i moža bačyć kartu svaich pryład, kiravać kantentam hetych pryład. Z našaha boku my budziem pradastaŭlać technałohiju i techničnuju padtrymku.
Nam prapanoŭvali addać adrazu 40% kampanii, i heta śmiešnaja ličba
- Niama adnaznačnaha adkazu na pytańnie, ci nie škadujem my pra toje, što ŭ 2012 hodzie admovilisia ad premii Kiembrydžskaha ŭniviersiteta. Tady nam prapanoŭvali addać adrazu 40% kampanii inviestaram, i heta śmiešnaja ličba, tamu što vidavočna:
kali kampanija raście, joj spatrebicca druhi-treci-čaćviorty raŭnd. Kali inviestary zabirajuć 40% kampanii, u jaje zasnavalnikaŭ źnikaje matyvacyja.
My pačynajem pracu z rekłamnaha rynku z-za taho, što jon dazvolić vielmi chutka maštabavacca
- Naš pradukt cikavy pa dvuch pryčynach: jon pryciahvaje ŭvahu ludziej i dazvalaje prajecyravać raznastajnyja vyjavy. Tamu jon moža vykarystoŭvacca luboj kampanijaj, u jakoj jość nieabchodnaść prezientavać svoj pradukt dla vialikaj kolkaści ludziej. My miarkujem, što naš pradukt pryciahnie ŭvahu arhanizataraŭ masavych mierapryjemstvaŭ i vystaŭ, dy što ŭžo tam - jon moža vykarystoŭvacca ŭ luboj kramie na vulicy. Ale my pačynajem pracu z rekłamnaha rynku z-za taho, što jon dazvolić vielmi chutka maštabavacca. My miarkujem, što rekłamnyja ahienctvy zachočuć razam z nami pabudavać sietku rekłamnych dysplejaŭ.
Hetyja chłopcy robiać kłasnyja hadžety, prosta jany nie padychodziać dla rekłamnych metaŭ
- Siońnia my nie viedajem nivodnaj kampanii, jakaja prapanuje pradukt, anałahičny našamu. U nas jość vopyt supracoŭnictva z vydatnaj amierykanskaj kampanijaj Monkey electrics: niekalki hadoŭ tamu my ŭziali ŭ ich ekskluziŭnuju licenziju na vykarystańnie ich technałohii na terytoryi Anhlii, ź jakoj i pajšli na pieradaču Dragon's Den. Ale potym zrazumieli, što nie zmožam vykarystoŭvać hetuju technałohiju ŭ rekłamnych metach pa techničnych pryčynach - nie samaje dobraje pašyreńnie, nievialikaja kolkaść koleraŭ - a dla rekłamnych metaŭ heta važnyja charaktarystyki. Hetyja chłopcy robiać kłasnyja hadžety, prosta jany nie padychodziać dla rekłamnych metaŭ.
Ci jość u našaj technałohii biełaruskaja budučynia? Ja nie viedaju
- Hałoŭny inžynier našaha prajekta - Dzima Malinoŭski - žyvie ŭ Minsku, my ź im pracujem dystancyjna.
U Biełarusi my chočam adkryć adździeł techničnych raspracovak, jak heta robiać šmatlikija kampanii. Pa-pieršaje, tut vielmi mocnyja inžyniery, a pa-druhoje, heta tańniej.
Ci jość u našaj technałohii biełaruskaja budučynia? Ja nie viedaju. My - nie kampanija, jakaja pradastaŭlaje servis. My šukajem partnioraŭ na novych terytoryjach, jakija sumiesna z nami buduć ustaloŭvać hetuju sietku i vieści ŭsiu apieracyjnuju dziejnaść. Kali taki partnior znojdziecca ŭ Biełarusi, to čamu nie?
Nia vynachodniki, a raspracoŭščyki
- U biełaruskich miedyja, kažučy pra nas, časta vykarystoŭvali słova «vynachodniki». Ja dumaju, jano nie zusim dakładna apisvaje nas.
My prosta raspracavali pradukt z peŭnymi techničnymi charaktarystykami, jaki moža rabić peŭnyja rečy i adkazvaje vyznačanym patrabavańniam rynku. I my raźvivajem hety pradukt. Jak, naprykład, kampanija Apple, raspracavała kłasny telefon, ale jana nie vynachodziła sam telefon jak pryładu.
My nie viedajem: 150 tys. funtaŭ - heta mała, šmat ci dastatkova
- My vyjhrali pryz u 150 tys funtaŭ, i, pa ŭmovach konkursu, jany pavinny być tolki na markietynhavuju kampaniju dla Kino-mo. My pakul nie viedajem, ci budzie ich mała, šmat ci dastatkova. Nam samim heta cikava.